近日一名女生在社交平台分享親身經歷，引起網民熱烈討論。事發於8月25日，她乘搭970號城巴期間，目睹一名坐輪椅的老伯欲上車，卻因輪椅專用位置被行李箱佔據，遭車長拒絕登車，要求他等下一班車。老伯堅持乘搭該班車，幸有熱心乘客伸出援手協助上車，亦有人主動讓座，最終老伯成功登車，但卻遭車長責罵：「都叫你搭下一班㗎啦，搞到咁鬼逼，其他人冇位企、冇得行啦。」
老伯輪椅停通道旁用手扶穩超心酸
樓主拍下現場情況，相片中可見輪椅位被至少兩個大型黑色行李箱佔據，橫放於地面，上方還放有一個背包。其中一個行李箱旁站着一名年輕女子，未知是否行李物主。由於輪椅位無法使用，老伯只能將輪椅停在通道旁，並一直用手扶穩，場面令人心酸。
帖主指出，當時車廂仍有不少空位，「我哋啲乘客都冇介意，車長就係咁鬧伯伯」，令在場乘客感到不滿，紛紛出聲反駁車長：「好多位喎，大把位啦！」更有人笑着回應車長，場面溫馨。
城巴聯絡女生了解事件
女生又感慨地說：「嗰個位唔係輪椅人士優先使用㗎咩？係咪應該叫擺咗行李篋嘅乘客讓返個位出嚟？作為車長，唔叫不特止，又唔幫伯伯上車，伯伯上咗車仲係咁話佢，坐輪椅佢想？搭架巴士都要佢讓位？」。其後女生又補充，「城巴聯絡咗我，已將車長編號告知，如何處理，將交由城巴決定，唔會公開車長編號，原意只係希望同類事件唔會再發生」。
城巴：已即時展開調查
城巴回覆傳媒表示，已即時展開調查，並主動聯絡帖文目擊者以掌握事發經過、班次及車長編號等資料，以便從速跟進事件。城巴又強調，公司非常重視為乘客提供傷健共融的乘車環境，所有輪椅乘客均享有輪椅停放處優先使用權；當輪椅乘客登車時，車長應當為他們提供適切協助，包括降低巴士車身、展開輪椅上落板、確保輪椅安全固定於輪椅停放處，方能繼續行程。
網民大罵車長做法
事件引發網民關注公共交通設施的使用安排及對輪椅人士的尊重與支援，「作為車長，應該係問啲篋係邊個既，叫對方拎開，而唔係唔俾輪椅上，冇人認係邊個既話，大叫唔拎走掉咗佢，呢張相其中一個篋係咪企响度㩒緊手機果個？係既話，叫佢拎走」、「個阿伯唔應該受呢啲委屈！ 曾經見一位巴士司機發脾氣鬧一個推住30幾歲殘疾兒子嘅70幾歲阿婆 等車位置企唔啱搞到佢對唔正隻門開塊板，個司機一路開塊板一路鬧阿婆，阿婆上咗車之後好委屈一路講一路喊：我咁老仲推住個仔，你估我想嘅咩！」、「作為輪椅人士，出街坐巴士經常遇到」、「唔怪之我屋企兩老咁抗拒坐巴士」、「將啲行李位擺喺輪椅位嗰啲個司機唔鬧?」、「容許輪椅位擺放行李,本身就係司機自己造成嘅鬧劇。」、「我係你我會投訴個司機，個司機完全錯晒」、「呢個可以投訴，上次我放咗個行李篋，有人又放賣餸車，車長一句有輪椅上車，要大家移開晒啲野，大家就已經夾手夾腳清空晒。車長有責任提醒乘客移開雜物，而唔係怨返個輪椅客轉頭」、「我成日都見到車長開閘落板，之後仲去輪椅位準備幫輪椅人士扣安全帶，見到有行李」、「有次坐九巴又係輪椅位放咗行李，車長好大聲叫人攞開無人理，第二次直頭話無人認就掉出車，當想行動時第二排先有件麻甩佬拿拿聲走岀嚟搶返」、「嗰個位輪椅優先，有輪椅上車，所有企喺嗰度既人同物件都要讓位」、「如果我企嗰個位，輪椅我一定會讓，其它就睬佢都傻」、「果個位係輪椅優先架， 有次我遇過個巴士司機， 佢嘅做法就好唔同， 佢大叫放行李即刻拖走個行理， 比輪椅人士用。」、「作為車長，應該履行職責協助輪椅人士安全上落車。輪椅使用者是有權使用巴士上指定的輪椅停放區域，車長應即時提醒乘客拿走行李，不得佔用，阻礙該位置！」、「我見親呢個情況，司機都係叫啲人執走啲雜物比輪椅泊入去。呢個司機似乎搞錯咗啲野，佢應該要去再培訓」。