近日有港媽在社交平台發帖，控訴丈夫「毀掉」自己精心準備的健康午餐，引起網民熱烈討論。帖文指，她花兩小時煲粟米薯仔湯，再加入通心粉，準備給一家人享用，卻發現丈夫在盛湯前「懶醒」，加了一包即食麵調味粉入湯中，令她大為光火。
網民：你老公肯飲都已經覺得佢好偉大
事主在帖文中寫道：「我煲咗兩小時嘅粟米薯仔湯煲通心粉，我想一家人食個健康午餐……佢就懶醒，加多包即食調味落去煲湯入面，我真係想講粗口，成煲湯變咗味精湯，我仲比唔比個女飲呢？我成朝整湯料嘅時間白費曬，好救命，點解會咁。」
事件引來大量留言，網民對烹調方式及食材選擇議論紛紛，有人質疑：「通心粉煲兩個鐘？？」、「齋碳水唔落肉係唔駛煲咁耐」，更有人戲言：「粟米=澱粉，薯仔=澱粉，通心粉=澱粉，三種澱粉煲一煲澱粉水……你老公肯飲都已經覺得佢好偉大。」
亦有網民關注食材顏色：「到底有邊種材料可以令舊白蘿蔔變粉紅色？」有人直言：「煲兩個鐘嘅通粉水邊個飲得落。」另有留言表示理解丈夫行為：「粟米薯仔湯煲通心粉，冇肉冇蛋白質，落包味粉至少有味。」
事主回應強調自己是新手媽媽
事主其後回應，強調自己是新手媽媽，選材由女兒決定，並解釋：「點解會用兩個鐘，因為我兩條新鮮粟米，一粒一粒搣入去，這是我個女兒的親子湯。我自問無廚藝，但我起碼會去試。我唔信你哋個個出世就識煮餸煲湯。」
事件引來不少網民建議事主學習基本煲湯技巧，並提醒「齋碳水唔等於健康」，應加入蛋白質食材如雞肉或瘦肉，才符合均衡飲食原則。亦有人笑言：「下次煲兩個鐘，記得落啲肉，唔好再煲澱粉水。」