行路唔好睇電話，除咗驚撞到人，仲可能因為咁而誤踩「地雷」！近日網上流傳一組照片，有網民在港鐵站見到有人疑似大便失禁導致地面留有大片污漬，最慘的是後方一位行人因為掛住睇手機，竟然在不知情下跣親並直接「坐咗落去」，引發網民熱議。
地鐵站通街「地雷」 路人掛住睇手機慘中招
根據網民在社交平台分享的相片，地點疑似在某港鐵站大堂。相中見到地面有一灘深褐色的污漬，上面雖然放有一張橙色紙張作標記，但似乎未足以引起所有人注意。
樓主留言爆料指：「有人喺地鐵站通街瀨屎……跟住有人睇手機冇睇到跣親，一下坐咗落啲屎度。」從相片可見，地面明顯留有被抹開、帶有污跡的痕跡，令人隔著個螢幕都覺得「有陣味」。
行路唔好睇電話之最佳助證
貼文發布短短不到 20 小時，已經吸引超過 4,000 人點讚及過百則留言。有網民直言這次意外是「行路唔好睇電話嘅最佳助證」，獲得數百人認同。另外亦有網民感嘆今年為何這麼多關於「屎」的帖文，並對車站內的衞生情況表示憂慮，認為這樣的「意外」對清潔工和其他乘客都造成極大困擾。
根據《港鐵附例》，任何人在鐵路處所內作出不雅或令人反感的行為，均可能被檢控。雖然突發性身體不適難以控制，但如果發現車站內有污漬，應即時通知職員處理，以免再有乘客因為睇電話而發生「坐地雷」慘劇。