尖沙咀夜空昨晚（30日）上演一場「天花板級」求婚！一批無人機在空中砌出巨型「Marry Me」（嫁給我）字樣，並以紅心包圍，場面極為震撼。整場浪漫表演迅速在網上瘋傳，吸引大批市民圍觀及拍攝，多角度片段隨即在社交平台洗版。
無人機砌「Marry Me」轟動全城
從網上流傳片段及照片可見，一隊無人機從維港上空逐漸升起，先後拼出多個圖案，包括：由高樓之間「冒出」的貓咪圖案、紅玫瑰花形、「1150 Days」字樣、立體紅心等，最終組合成「Marry Me」求婚字句，並配上一句英文宣言：「Tonight love writes itself across the sky and into eternity」（今晚，愛將自己寫滿天空，並走入永恆），畫面極具電影感。
網民關注要用幾多錢
相關影片迅速在Threads等平台瘋傳，不少網民即時被震撼，紛紛留言討論：「cxs 請問邊個師兄book咗無人機求婚」、「今晚邊個有錢人喺尖沙咀求婚」、「多謝有錢人俾我見識到無人機求婚 唔知個女仔有冇say yes」、「邊個咁大手筆？」、「如果budget許可，安排一場無人機世紀求婚，再加配一個氣球花藝求婚場景同步進行，呢個儀式感絕對係天花板級別！」、「以為係幻彩詠香江，點知係求婚現場，餐廳秒變大型八卦現場，恭喜晒」、「可能已經贏咗鍾培生式求婚」、「冇得輸！ 師兄型爆」、「OMG 呢啲霸總小說裏面啲嘢，原來真嘅」、「俾人閃到盲左」、「大癲！ 做壞規矩」、「視覺效果真係好正，如果係一間靚酒店或者船上之類有私隱嘅地方睇住就更有feel」。
主角真身曝光
其後，主角真身曝光，不少網民紛紛湧入其社交平台祝賀，「全港人都知無人機求婚～～恭喜晒」、「頭先睇到你個threads !! 發現你哋兩個平時都咁sweet」、「無人機求婚 效果及品味 好過 進擊的巨人跳樓求婚」、「睇無人機求婚，點都好過睇粵劇求婚」、「So sweettttt要幸福！恭喜唒」、「恭喜🎉祝你哋幸福快樂」。
