《東張西望》昨晚報道苦主王小姐北上拔罐恐怖意外，令北上按摩消遣的安全隱患再次惹起討論和注意。其實類似王小姐遇到的意外經常發生，但是不少北上按摩拔罐的港人仍然心存僥倖，《東張西望》街訪時發現，很多人雖然已經聽聞意外，但是仍然因為價錢吸引冒險嘗試。
回顧王小姐的經歷，非常慘痛，片段所見，目前她的肩膀大面積被火燒傷，脫皮情況嚴重，據醫生所說，未來就算康復，疤痕仍在，令她身心靈受創：「我覺得如果咁樣着出街呢，人哋會當我怪物，我自己望到都覺得核突，人哋望到更加啦！」
其實意外過程亦都非常離譜，七月她上深圳做推油加拔罐，只是到第二個罐就出意外，當時感受到身體有大量液體，然後就覺得灼熱，回頭一望原來已經好大火！唯有立即在床上碌滅火，但是技師竟然全程無幫過手！「叫我唔好喐，跟住然之後佢企埋一邊。」不止袖手旁觀更阻止老公入內，「跟住佢啲技師擋住唔畀我老公入嚟，同佢講就係話，冇事啊，你老婆冇事呀，好小事唔使擔心！」身上着火都無事？王小姐望望傷勢自己都嚇咗一大跳，但噩夢才剛開始。
其實拔罐這種中醫療法無論在香港或者內地監管上都存在灰色地帶，條例只監管註冊中醫診所或者係醫院，但美容院按摩店等場所提供呢一種服務就似乎變得無王管。而拔罐操作需要專業手法經驗，用埋火好易出事！
香港中文大學中醫學院及中西醫結合研究所客座副教授林冠傑指：「如果治療師或者唔係中醫師有冇經過培訓，佢將啲酒精就擺得好近，好多人為咗方便可能就打開咗個罐喺度，就咁點」，意外往往就這樣發生，他說有時有些人大意時燒到自己，甚至令到周圍起火。
王小姐遇到嘅情況更加離譜，由始至終店內竟然沒有人為她急救，只是不斷游說她不要報警，「佢哋都係撳住我哋，叫我哋唔好報警啊，你哋去醫院先啦，之後嘅嘢先處理啦，想趕我哋快去醫院，總之唔好喺佢間舖頭逗留」。最後王小姐堅持報警等公安錄口供，去咗三間醫院先睇到醫生，前前後後延誤成個多小時。
消委會其實十幾年前已經開始不斷接獲北上拔罐意外投訴，當時消委會已經提醒，由於拔罐要利用到火酒、火等消毒及減少灌溉空氣，如處理不善或技巧欠佳，拔罐過程中受用者可能被火燒傷、燙傷等等。其實受傷的機會也不只是倒瀉液體，有時火源太過接近，或者手法過於急進，都可能令到受用者受傷，所以其實拔罐的技師必須小心觀察受用者的反應再調整，沒有牌照的技師其實非常危險。
另外消委會提醒，六類人其實不宜拔罐！
1. 血友病或有凝血功能障礙患者
2. 患活躍性肺結核、惡性腫瘤、糖尿病等傳染病或重症者
3. 患有精神病或昏迷人士
4. 皮膚過敏或在腰拔罐的部位有皮膚病者
5. 身體太瘦、露骨不平、無法多、肌肉失去彈性人士
6. 六歲以下的兒童或70歲以上的長者
婦女妊娠期間下腹部、胸部、心臟部位不可拔罐，其他部位手法宜輕
另外，過飽、過饑、過渴、醉酒均不宜拔罐，另外應該避開神經、動脈、心臟等重要腑臟和器官、頸前、頸側等，以免高壓造成血栓導致中風。