日本早前出現咗「撞人族」，佢哋喺人多密集嘅地方，專登批踭撞向女士同小朋友，引起社會譁然。但更加得人驚嘅係「撞人族」殺入咗香港！
觀眾曾先生三月就係荃灣一個商場目擊咗呢個「撞人哥」古怪嘅行為，更加拍片影低對方！片段見佢雙手插袋，曲起手踭，條路咁闊都專登行埋去撞呢位長髮女士膊頭，但對方不以為意！「撞人哥」又繼續搵下一個獵物！喺入門口呢啲狹窄位，佢更加唔放過，大大力撞呢位啡色衫女士膊頭，光天化日之下，真係好大膽。短短幾分鐘路程，已經見到「撞人哥」連環撞咗至少四位女士，似乎有搏懵抽水之嫌！
曾先生接受訪問時表示，事發時男朋友喺隔離都照撞，好大膽。究竟曾先生目擊嘅係只係個別事件，定係已經成為現象？街訪中，有市民表示有遇到過，覺得係搏懵心態。曾先生其後上前追問對質，對方一走了之，他覺得無奈，最後希望同類事情唔好再發生。