TVB綜藝歌唱真人騷《中年好聲音》，周日（19日）晚播出的第12集，將展開第五部曲首回合《雙人合唱！二選一離場！》，晉級16強的選手，將分成8組表演合唱歌，而今個回合的嘉賓評審是B哥哥鍾鎮濤。值得留意的是，由今集起將新設MVP獎項，由嘉賓評審選出當晚表現最好的選手。
是集，最大焦點落在哭求父母原諒的參賽者梁浩銓，浩銓孖住曹敏寶化身限定情侶，獻唱<從不喜歡孤單一個>，獲得76分。梁浩銓上集親手寫道歉信，兼送上錄影入場券求父母原諒，最終得償所願，獲父母原諒兼放下芥蒂，現身錄影現場送上支持。
梁浩銓事前毫不知情，見到父母在台下即感動爆喊，並在台上真情剖白：「好耐冇見過你哋，但我真係冇勇氣同你哋講……我會好努力做番好你哋個仔，我會令你哋重新信任我、接受我，寫嗰封信真係用咗好大勇氣，好想你哋原諒我。」
梁浩銓即將升呢為人父：「希望嚟緊可以同你哋、細佬同佢嘅小朋友，同埋你哋大仔（指自己）個孫，你大仔準備做爸爸喇！好想同你哋一家團聚，同你哋一齊食餐飯，可唔可以呀？」梁爸爸及梁媽媽感受到大仔浪子回頭，露出欣慰表情，梁母坦言已原諒佢：「我哋已經放低㗎喇，今日嚟即係代表支持你，你繼續努力啦！」浩銓感人剖白引爆全場淚水，感性肥媽與車婉婉忍唔住落淚，場面感人。
