廉政狙擊｜傅嘉莉碌落山慘死 黃智賢罕演反派奸得有型有款

由邵氏兄弟及優酷出品，樂易玲擔任總製片人的新劇《廉政狙擊》，昨晚（7日）以尹在詩（傅嘉莉飾）為主角的藝術品洗黑錢個案迎來尾聲，在詩被扣留期間發現懷有卓日升（高鈞賢飾）骨肉，惹來日升父親卓廷光（黃智賢飾）不滿，因而招來殺身之禍，最終失足碌落山慘死！雖然Kelly出場時間只有四集，但仍成功突圍，她與Ben的「鈕扣對峙」，在無綫官方社交網播映後反應熱烈，兩日勁吸近四十萬views。

談到山坡戲拍攝花絮，Kelly憶述由於當日在大帽山拍攝時相當大霧，所以全程拍吓停吓，不但髮型難以連戲，情緒亦斷斷續續，幸好最後順利完成：「我哋好多次因為朦到拍唔到，鏡頭直頭見唔到我同阿Ben個樣，我哋要偷陽光拍。嗰場係我嘅煞科戲，其實好緊張，無奈天氣令到我不斷講一句嘢就要cut機，搞到頭髮都Drop晒唔連戲，但又反而多咗份滄桑淒美感。」

至於同場口的黃智賢同樣贏盡讚賞，單以簡單數句對白及別具張力的眼神，已將氣氛推向緊張，網民讚愈來愈有戲之餘，又指難得奸險的Ben「奸得嚟有型有款」。談到角色入屋，Ben謙稱要多謝導演與阿水的信任；為了配合角色髮型刻意減肥：「初初試造型時，樂小姐同造型師想我有啲白頭髮，但就想我長頭髮。我就諗不如剪短晒佢，但咁樣塊臉一肥就好覺，所以要減吓。」Ben續指沒有刻意為角色定忠奸，最重要是有血有肉：「我對羅霖一個態度，對兩個仔態度又唔同，咁會令到角色立體啲。反派人物要畀到壓力出嚟，場戲先至成立，所以呢方面我有去思考點做。」

昨晚一集是阿Ben「晒冷之夜」，除將與Kelly再度緊張對峙，他被扣查後在盤問室與韋Sir（王浩信飾）的「互拋浪頭」相當精彩；為了掩飾罪行，Ben飾演的卓廷光全程否認指控，其間幾個微表情卻能清楚看到其暗藏內心的動搖及不安，演技有層次。