由文偉鴻（Jazz）監製、林麗媚、梁恩東編審的《隱形戰隊》，集合劇情、動作、性感及懸疑四大元素，首播後贏盡關注，一眾演員的身材更是焦點所在！先說男主角陳山聰及林子善，為了符合CTRU反恐特勤隊身份，早於埋位拍攝劇集前半年，已努力操肌兼控制飲食，最終操出違反人體力學Body；山聰因為練出「頸肌」，以致穿起軍裝感覺巨大隻，他亦自嘲望落似足「猩猩王」，更遭同劇演員取笑「撐爆車廂」！子善則因為手臂「老鼠仔」長期準備「破衫而出」，亦惹來不少關注。
至於女主角最強Body 2.0之爭，則非劉穎鏇（Tiffany）與劉佩玥（Moon）莫屬，前者操出女性10%極限體脂和蜜桃臀，完美展示超過數個月地獄式特訓亮麗成果。上周五晚（10日）一集，萬眾期待的Tiffany水著派福利畫面隆重登場，一身「彩虹戰衣」的Tiffany，以出水芙蓉姿態出場，其婀娜多姿的上水背影亦相當吸睛，「最強Body」明顯Level Up。除了身形殺食，Tiffany表情相當可愛嬌俏，魅力指數爆燈。至於肩負「誘惑擔當」的Moon，則身穿粉紅色斜肩設計一件頭泳衣登場，除了突顯白晳肌膚，一雙修長美腿是相當屈機。
談到萬眾期待的泳衣場口，Tiffany首先想到的是拍攝當日早上「唔敢食嘢」：「我練咗啲腹肌都好想出到，但嗰排開工都開得密冇特別抽到時間再操好啲，所以只能朝早唔食嘢淨係飲齋啡去keep。」
Moon則指拍攝當日除了冇陽光，仲要好大風，而她全程亦是最擔心Tiffany：「我哋鏡頭前面可能好靚啦，但其實暗椏底係起晒雞皮，我哋兩個就互相幫大家取暖，例如阿Tiff落咗水或者上水，我就會好緊張畀條毛巾佢，或者問佢凍唔凍、要唔要飲熱水。好彩有Tiff陪我，都拍得幾開心，因為拍攝場地好多人，又好好玩。」阿Moon笑指自己所穿的一件頭泳衣相當蝦人著，拍攝當日亦有刻意減少食量。
