武打影星陳惠敏憶述患腦癌經歷 驚悉患病好驚：點會諗到個腦有cancer？

即將80歲的武打影星陳惠敏，於2020年曾經中風兼患有肺癌，經過治療後已戰勝病魔。不過，近年又有傳陳惠敏健康再度出現問題，近日他接受其他傳媒訪問，更在訪問中親揭三年前曾患有腦癌！

陳惠敏近日接受其他媒體訪問，驚人透露他三年前曾患上腦癌：「我3年前因為cancer令身體弱咗好多，我而家醫返好，冇事㗎喇，但係最近呢半年又輪到對腳，可能我後生打架多，又練武，搞到對腳嘅軟骨冇咗，行路非常之痛，我而家兩邊腳都換咗髖關節，換咗幾個月，因為行路平衡唔係咁好，行路都拎拐杖就下啲力。」

陳惠敏又在訪問時憶述腦癌經歷：「有一輪我喺屋企落梯都覺得有啲暈暈哋，成日覺得有啲唔妥，點知有一次落樓梯之後，突然成個人暈咗，之後咪去醫院檢查，檢查完發現個腦有粒好似綠豆咁大嘅嘢，影響咗成個人，有時候會覺得好唔清醒。」慶幸的是，陳惠敏當時連化療和電療都不用做：「醫生話一千個人都冇一個好似我咁，因為我運動底子好，我剩係打針同食藥，連標靶都唔使做，只係每20日返去醫生度吊針，吊咗差唔多一年，每吊一次都要7、8萬，都用咗好多錢，用咗百幾萬，不過而家健康好番，冇乜大礙。」

陳惠敏再指：「點會諗到個腦會有cancer？嗰陣係好嚴重，成日暈，睇嘢又睇唔清楚，因為係喺右邊個腦發現，影響咗左邊嘅身體，所以我而家都有少少唔係咁靈敏，仲有啲痺，仲試過冇乜力。嗰陣辛苦我太太，仲有自己都諗唔到，後生嗰陣咁強壯，講句牙擦啲，真係打勻東南亞，點解老咗會變成咁呢？不過醫生都話好好，腦癌咁嚴重都醫返好，算係一個奇蹟。」