資深動作演員孟海病逝，享年65歲。得知前男友孟海過世的消息，羅芙洛(Cynthia Rothrock)發文悼念「Very sad news my friend and director of Lady Reporter just passed away...RIP Mang Hoi🙏🙏🙏😥just talked about him in an interview yesterday 」得聞悲訊後感哀傷，又稱呼對方為好友，並指在昨日的訪問中才剛談到對方。
孟海影視生涯最為人津津樂道的必定是《皇家師姐》，他獲得了金像獎最佳男配角；孟海還有一個收穫，就是和戲中的羅芙洛有過一段戀情。當時她們一起工作，孟海為了對方學習英語，甚至之後還專門為女友量身打造了一部電影《師姐大曬》。
羅芙洛當年被洪金寶睇中拍戲，孟海知道吳思遠已簽約旗下，因此很快被安排來港拍《皇家師姐》。2022年孟海罕有接受港台《一起走過》主持人楊紹鴻、文頌嫻訪問，分享當年同女打星羅芙洛分開的原因。主持人問他是否一見鍾情？孟海說：「邊有咁多情，日日開工對住，日日教佢做戲。（一齊幾多年？）5年幾，唔係一見鍾情，《皇家師姐》拍咗6個幾月，日日開工，全靠楊紫瓊做翻譯，教佢講對白、走位、教戲。（為對方去學英文？）冇，就係同佢哋兩個學，講講吓就識，開頭佢同我講請中文老師畀佢，跟國語老師學咗2、3個禮拜都唔得，就搵咗個廣東老師，學咗1個月都係唔得，就話不如你學英文算啦，咁我就學英文。（為何分手？）佢係都要結婚，嗰時我只得26歲，對我嚟講梗係唔得，一結婚就要去美國，佢一定要返美國，後來佢都係美國繼續拍戲，佢都有叫我去拍，有澳洲同其他地方，我就一部都冇接過，因為嗰時唔係好想。（有否後悔放棄外闖機會？）梗係冇，點會後悔。」
