美斯無上陣｜高海寧身在現場睇波：明白各位失望 冷靜下來會諒解球王

國際邁亞密昨日（4日）與香港隊進行的表演賽，球王美斯失場引起軒然大波。當日，有不少圈中人特定去捧場，包括高海寧（高Ling）。

當日，高Ling仲成功同碧咸打卡集郵，狀甚興奮等開波！但球終究沒有落場，令廣大球迷失望，今日高Ling出席義工團隊的賀年飯活動時，被其他傳媒問到美斯失場感受時，高Ling指：「當然嗰個都想睇美斯，但注意力唔係只在於美斯，場波都好重要，呢個賽事無論對於球員同觀眾都係好surprise嘅事情。（你係咪一心入場睇美斯？）邊個唔想睇美斯，我之前去巴塞隆拿旅行都買飛入場睇波，嗰場美斯係超水準發揮，我有生之年睇到佢喺現場踢波已經好開心。當然尋日都好想睇佢落場，但聽講佢係受咗傷，作為球迷都希望美斯有好身體狀態去比賽，我可以諒解呢件事。（係咪聽到好多人噓？）每個人反應都唔同，都明白各位嘅失望，你一心入去睇偶像，偶像又受傷冇得落場，當下嘅情感係澎湃，反應係激烈，但當大家冷靜落嚟，大家都會諒解呢件事，因為冇人會想美斯受傷。係期望同睇到嘅嘢有落差而失望，美斯都有坐足90分鐘，而且碧咸又行來行去，大家係開心，佢哋好Nice有幫人影相同簽名，好冇架子。」

高Ling更笑稱成功跟碧咸集郵：「我當日剛落機，都即時返屋企妝扮完過去睇吓影唔影到相，真係畀我影到，佢又幫我朋友簽名，我有少少唔好意思，佢當時唔係工作，我唔好意思不停阻住佢，但已經好滿足，人生都唔知會唔會再有機會。」

圖片來源：高海寧IG