Twins演唱會早前圓滿落幕，「阿Sa」蔡卓妍一完演唱會，即刻飛往泰國度假差差電！日前，她趁農曆新年假期，有時間重溫演唱會絕密片段，並撰寫長文回顧演唱會點滴。
阿Sa撰寫長文說：「農曆新年假期你哋點過呀？呢個假期我嘅節目非常豐富，狂食狂瞓，打吓牌、吹吓水、去吓旅行、拜吓年咁啦！呢兩日先至有少少靜落嚟嘅時候，撳吓個相簿，睇返好多喺舞台上面嘅片段同埋相，有啲掛住演唱會嘅日子㖭。」阿Sa逐一多謝一班在演唱會期間默默付出的工作人員，還有工人姐姐、司機阿權、幫手洗衫的工作人員Michael每一天的照顧和協助。
阿Sa提到自己聲帶受傷已經數年，更點名感激好友曾樂彤於後台幫忙伴唱「打大佬」：「我仲要非常非常多謝曾樂彤，1月20號第一次上台總綵排之後，我個人可以話灰到一個點。我把聲仲未可以控制得好好但第二日已經係show day，佢本身係嚟幫手影吓相又做吓觀眾，但佢知道我嘅擔憂之後，就自告奮勇話陪我一齊唱unison。第二日當佢把聲輕輕喺我耳機裡面出現，我又真係好似輕鬆咗喎。個感覺係好似打機，有人陪你一齊去打大佬咁，第一日完咗show，我落台後即刻攬住佢喊。大佬呀！觀眾聽唔到佢把聲㗎！剩係得我一個聽到，咁樣佢都肯陪我唱足14場，仲唱到聲都沙埋，實在太偉大喇！而我亦都可以慢慢將佢把聲喺耳機度一日比一日咁調細聲啲，我真係超級無敵感謝佢，大恩大德無以為報。」阿Sa最後亦說：「就係有佢哋每一個嘅幫助，我先可以咁大無畏放心地去完成呢個挑戰！好好好好多謝你地。」
曾樂彤亦有窩心回覆阿Sa：「在心中❤你對我同對身邊人嘅好天知地知大家知，我係去報恩㗎，愛你喲。」兩姊妹感情真係好好。
圖片來源：蔡卓妍IG
