唱作人陳健安（安仔）一連四場的《Live afteR Life 陳健安2024演唱會》，前晚在旺角麥花臣場館圓滿結束，安仔媽咪坐正第一行睇足全場，又喊又笑，還跟觀眾一同站起來揮手跳舞，十分投入。
安仔開騷，C AllStar好兄弟梁釗峰、樂隊Nowhere Boys的Van、女團Me&的Vian、同門師弟蔡浩然和洪端珙、好友麻利、鍾雪瑩等都有捧場，非常熱鬧。
完場時，觀眾不散場，大叫encore，安仔再度上台，他向觀眾席拋出紀念品冷帽。觀眾大叫「除衫」，安仔扮聽不到，連唱三首歌，包括慢版《唔明你講乜》、《煉獄健身室》和鋼琴版《仍然是那個少年》，然後突然除去身上演唱會Tee恤拋去台側觀眾席，全場尖叫起哄。最後他說：「我好開心、我好滿足，我嘅第一個演唱會有你哋一齊見證，期待大家嘅千字文，我會好好品嘗，希望大家好好回味呢個演唱會，多謝大家！」然後衷心鞠躬致謝，全場掌聲歡呼，演唱會完美落幕。
完騷後安仔返到後台說：「真係好開心，好感動，好難得完成四場演唱會，第一次一個人唱晒4場，之前真係有啲擔心，今日我好滿足！媽媽嚟咗睇兩場，開場第二首歌《愛的一種練習》，每次唱都會搵吓媽媽。之前我開新碟發布會專登唔唱呢首歌，留返有full band咁唱畀佢聽。第一場完騷後，佢同我講佢喊，我話我喺台上睇到」。安仔演唱會和音「雷同二友」成員兼表演嘉賓謝芊彤對安仔說：「我見到你媽媽眼神，非常支持你，令我哋好感動」。另一位表演嘉賓，女歌手廖穎琛大讚台下安媽悉心打扮，安仔爆料：「媽媽今日專登化粧Set頭，佢平時無化妝架，每次佢去捧我場，例如之前頒獎禮，佢就會化妝扮靚，隆重其事，代表佢好支持我。」
演唱會圓滿成功，安仔最想食火鍋和飲凍檸茶，他說：「我為咗演唱會食清淡啲，不經不覺戒口個多月，主要食粥，整個月無飲凍飲，依家好想飲凍檸茶、食肥牛、炸响鈴，仲要有咸蛋黃嗰款，唔邪惡唔食」。
