芷珊約您｜拒做「老海鮮」自揭十萬蚊人仔賣斷《斷點》專輯失過億版稅經歷！

由黎芷珊主持的全新節目《芷珊約您》，周日晚（28日）播出第二集的嘉賓是張敬軒（軒仔），芷珊飛到紐約直擊軒仔美國巡唱的最後一站，軒仔於能夠容納1萬9千人的UBS Arena開騷，更是首位於該處開騷的華人歌手，認真威水。

開騷前一天，芷珊去到軒仔下榻的酒店進行突擊檢查，當時穿着浴袍的軒仔匿在房中熨衣服，場面搞笑。為了幫軒仔開騷前鬆一鬆，芷珊特別訂了一輛Limo（豪華轎車）孖軒仔去喜雀兒市場閒逛兼食好西，兩人在車上一邊歎香檳一邊傾偈，Chill到爆！入行廿年的軒仔現在事業一帆風順，芷珊問他曾否遇過經濟困難？軒仔坦言有：「十個煲六個蓋囉，特別2004年開始，屋企係有困難，嗰刻係開始覺得我嘅生活同命運已經唔喺自己手上。」

軒仔亦承認曾為賺錢做過一些自己不喜歡的事情，並感嘆：「點解我會做歌手？因為搵錢搵得快。」軒仔續指年輕時因為等錢使，曾以十萬人仔賣斷收錄了《斷點》的專輯版權，並感嘆：「當年《斷點》據我所知（依家）係過億版稅。」講到未紅時，曾流連酒吧唱歌賺錢的軒仔，受過不少客人不禮貌對待，軒仔說：「唔需要有原因，一籃花生殼就飛埋嚟！」軒仔指當時雖自覺有點Hurt，但問了自己兩條問題後便決定放下情緒積極處理面對，最終以超高EQ應對危機，並磨練出日後的圓滑性格。

去到喜雀兒市場後，兩人Chill住閒逛兼大歎海鮮餐，兩人吃東西時繼續深入交流；被問到如何勉勵後輩，軒仔即就地取材笑言不想做「老海鮮」：「要保持平和嘅競爭心態，先可以行得更遠。 同埋最緊要係要有自信，其實你係有地位嘅，就算企好遠都好，人哋都會框番你出嚟。」

軒仔坦言：「一個內地人嚟香港（發展），你會覺得你有咩唔好嘅新聞，會好似變咗一個內地人嘅典範（代表），好多因素令我覺得輸唔起。」軒仔續指為了保持靚聲，連最愛的酒都不敢多喝：「我要Keep住把聲仲唱到以前啲歌，咁呢啲就係平時生活上嘅約束。」

問到未來十年的計劃，軒仔打算將多年來累積到的經驗與後輩分享：「用我哋捱過嘅苦頭去話畀佢哋聽捷徑喺邊度，呢啲係好好嘅傳播（傳承）。」芷珊問到現在的他快樂嗎？軒仔坦言：「快樂呀，行到42歲呢兩年係我人生最好嘅時候，我有自己團隊，無論做演唱會或者拍Youtube都有好反應，自己派嘅歌反應又好好，爸爸媽媽生活又安穩 ，自己想食嘅嘢又食得起，想去嘅地方又去得起，覺得人生好圓滿，但要Keep住落去係唔容易。」

芷珊還大膽向軒仔提問大家最想知道的感情事，42歲的軒仔坦言開始有想被人照顧的念頭，芷珊問到有否遇過適合的對象，軒仔想了良久後說：「（呢行）唔係好識到人係真嘅，同埋（我）唔係咁輕易畀人進入到我生命。」他又自認惡頂謂：「譬如有Potential成為情人嘅人，同一班Friend嚟到我屋企，會喺我屋企攞起啲嘢嚟睇睇，但係佢擺唔番啱個位，咁我就會行埋去擺番啱，咁就完咗喇。」芷珊向軒仔嚴刑迫供拍過幾次拖，軒仔說：「拖過一隻、半隻手仔咁啦，我係一個講將來嘅人，但一去到講將來標準就會唔同，我係冇『不如行吓睇吓點先啦』呢一種，我所有嘢都要Well Planned。」