直播靈接觸｜「積少」顏國樑患鱗狀癌走出鬼門關 分享彌留間請師傅「續命」真相

由梁思浩、黃紫恩（Jojo）及黃耀英主持，TVB Plus（82台）開台重頭戲及首個靈異直播一小時節目《直播靈接觸》，每集會有各門各派玄學大師坐陣，跟觀眾互動解答靈異疑難，更會邀請有份量藝人亮相，分享他們的靈異經歷。

上周一（22日）《直播靈接觸》首播後觀眾及網上互動都反應熱烈！昨晚（29日）一集，內容繼續扣人心弦，請來「積少」顏國樑及太太擔任嘉賓。顏國樑早前患上鱗狀癌，今年一月他接受鄧英敏網上頻道訪問時透露，接受過化療及免疫治療，談笑風間透露剛走出鬼門關。原來在藥石無靈階段，顏國樑彌留之際，太太毅然請師傅「續命」。

顏國樑在節目上提到，當時患鱗狀癌昏迷期間，更有「醫務助理」想帶他走！節目中見顏國樑精神相當不錯，他表示目前身體狀況OK：「做過手術，裏面擺咗支架，會痕，令到我咳，咳嘅時候似怪獸，好嚇人；同埋無電。」梁思浩則表示：「見過咁多次，你今日精神狀態係非常好。」

梁思浩指顏國樑當時經歷15日生死邊緣，太太霍潔貞四出求助，希望找到方法為老公續命，霍潔貞表示：「當時醫生同我講，隨時會轉差，佢入院已經昏迷要搶救。搶救咗十零分鐘，醫生行出嚟同我講『而家搶救咗，暫時OK，隨時轉差，要送去深切治療部』。

霍潔貞指當時有朋友跟她說：「會唔會諗下法科方面，我即刻諗起我娛樂圈好朋友，即刻打畀佢，8點幾，問佢有乜可以做，佢叫我第二朝一早去濟公廟裝塔香，呢15日係一個關。」

此外，顏國樑提到15日的昏迷與半醒之間的幾個片段：「首先我喺ICU係得兩個人，嗰個人喺度行來行去，我喺張床無奈地睇佢行，佢講電話：『我知，玩梗時差吖嘛，而家係下晝5點幾，唔係10點幾，我知，會過去澳門嗰邊做實驗嘛，我明。』」第二個片段則是老友打電話給他，跟他說：「你俾人整蠱啊，俾人玩梗時差，不過醫院知，會補償返畀你。」

至於第三個的片段，顏國樑則表示較為現實：「到時到候有兩個醫務助理，肥嘟嘟、大媽嗰啲，走埋嚟捉我。我唔畀佢捉，我覺得佢唔係善意，『你好曳啊』，你仲覺得佢係善意？兩個砰砰聲走埋嚟。」顏國樑續指：「當時我郁唔到，俾人綁住咗，佢又捉我唔到，打到隻手啲管甩晒，成床血，畀佢鬧『你好曳啊！你成日郁！』」