人作為大自然的一部份，有時總得要與野生動物共存。有觀眾、富蝶邨居民拍片報東張，希望為野豬發聲。
富蝶邨居民陳小姐拍下野豬悠然自得覓食的片段，希望為公眾帶出與野生動物共存的訊息。陳小姐接受開「東張+」記者訪問時，說看到當局放置捕獸籠後覺得很失望和沉重，認為大家不應該趕盡殺絕！
陳小姐娓娓道來野豬的來龍去脈，她說大埔富蝶邨本身在山頭開發：「本身都係開山劈石，呢度本來就係佢哋地方，但係我哋破壞咗佢家園。據說當年興建的時候，地盤工人和野豬也和平共處，即使地盤工人在工地吃飯，野豬也不會去騷擾。但反而是現在入伙後，就開始趕盡殺絕。」
陳小姐強調：「邨內不時會見到有野豬出沒, 但佢哋從來都冇襲擊人，亦都冇影響居民生活，大家一直都相安無事。只係間中有啲唯恐天下不亂嘅邨民會騷擾佢哋、甚至搵石頭掟佢哋，但佢地從來無反擊、同埋去唔同部門投訴.... 」
她見到漁護署設置咗捕獸器感到心酸，「我已經即刻打咗去1823查詢, 因為從來冇發生過襲擊人事件, 點解佢地要趕盡殺絕殘殺生命？」
她指出，邨入面大部份嘅人都接受同野豬共存，「野豬多數都會係朝早或者黃昏、晚間出現，就算出沒都只會喺一邊搵嘢食，佢地甚至識避人同避車，絕大部分嘅邨民都唔會去餵飼同騷擾佢地，我想知道漁護處憑乜嘢準則去獵殺佢地??」
陳小姐認為，邨內有其他問題更逼切要處理，「我地條邨由三月派樓到而家，好多嘢都搞掂，交通未搞掂，出入勁唔方便、民生設施未搞掂，例如商場都未起好，亦無食店，邨民買餸食飯都要去到老遠。周圍沙塵滾滾、邨內違泊問題嚴重、衛生情況差.... 我地明白係新邨, 所以都忍耐同接受, 但點解咁多急切性嘅問題都未處理好, 反而去搞d最無影響大家嘅野豬？」
不過她最後也深明一己之力難改變大家觀感，她說村內群組雖然大部分人也接受野豬出沒，但部分人反應激烈，質問「唔通出事先處理？」，她最後感慨，「報東張」只是為了出一分力去為野豬發聲和爭取，她說：「雖然我知道做咁多嘢都唔會改變到啲乜嘢。但至少我想表達，其實人類係咪真係唔可以同野生動物共存？點解野豬就要殺？野生猴子、野貓野狗呢就唔駛？定係只要有人投訴就統統都要趕盡殺絕？」