茶餐廳，是香港的代表之一，相信無人反對。「茶記」多選擇，小編不誇張，有時一日三餐都可以在「茶記」打坐，嘢食仲好好味！
香港人都知，「茶記」餐牌，以及伙記職員落單是有特定術語，黑牛（可樂加雪糕）、靚仔（白飯）、靚女（白粥），大家應該不感到新奇。今日在社交平台Threads，小編看到一幅照片，拍到一個疑似茶記的餐牌，有兩杯凍飲，分別叫「凍大個仔」、「凍大個女」，盛惠17元，是什麼東東來的？
「茶記」隱藏用語｜凍大個仔：你大個仔啦可以飲奶茶！
網民又來到發揮創意的時間了，發帖者打趣說，「你大個未啊」！
有網民已經解答了答案，原來是往時的茶記術語，「凍大個仔 = 凍奶茶；凍大個女 = 凍咖啡，意指是你大個仔啦，唔好再飲華田好立克，飲奶茶啦。」（嘩，典故都有，民間智慧確實令人佩服！）
「茶記」用語好有趣，例如忌廉加雪糕 =金牛；七喜加雪糕 = 白雪公主；阿華田原來叫「敗家仔」（賣田）！朱古力更叫「肥妹」！
「茶記」隱藏用語｜「仔女」一樣價錢夠均爭
有網民笑問：「點定義仔定女😂😂，點解奶茶女字邊反而係大個仔？」、「可以玩三代同堂喎🤔，凍老竇。凍老母。凍嫲嫲。凍爺爺。凍公公。凍奶奶。」
網民還突破盲腸，「仔女一樣價夠均爭😂👍🏻👍🏻」
圖片來源：Threads