香港人最重要是「烚吓烚吓」的火鍋文化，大家開心打個老邊，但若果待客之道做得不足，職員就連生牛肉、生豬肉都傻傻分不清，令到食客疑被誤導再陰差陽錯下「破戒」進食，真的So Sad。
是咁的，脆友jmjm__mi在社交平台Threads大申訴，等小編簡單還原事發經過，節錄一下該脆友的對話。話說事主在尖沙咀大型商場內的知名火鍋店進餐，「叫咗一份牛肉+一份豬肉，結果佢哋上菜嘅時候，話碟牛肉係豬肉，上豬肉嘅時候，又話係牛肉。」
最關鍵在於事主因為宗教原因，不能進食牛肉；事主認為被店員誤導之下，誤吃了一口牛肉。
後續如何？事主憶述與經理的對話，經理聲稱：「然後其實如果一個人唔食得牛肉，應該嗌鴛鴦鍋。」關事咩？！
此舉當然激到事主「上火！」：「我嗌唔嗌鴛鴦鍋，比你誤導左牛係豬有咩野關係？？？你自己員工講錯嘢，上錯菜係我唔嗌鴛鴦鍋問題？」事主最後說，火鍋店作為補償，可以「free個野飲。」
如果照樓主陳述，經理的危機處理的確有點問題，難怪樓主抛下了總結：「真係嬲😅第一次受到啲咁unreasonable嘅服務！唔明點解一間都算高級嘅餐廳服務，可以差過茶餐廳。」
中高檔火鍋店牛肉豬肉傻傻分不清｜網民感同「身」受 食完會搞肚仔？
似乎許多網民也幫襯過樓主所說的中高檔火鍋店，好有共鳴咁噃！「我之前都去食過呢間，又貴又唔好態度，返到屋企屙咗好多次，投訴佢又話我自己腸胃問題，🙏🏻唔會再幫襯。」
「食過一次，唔知係咪啲生蠔賴嘢，嘔到PK ，抖咗成日 ！」
「食過呢間服務真係好差，已經無再去食。」
大家肚仔有無事呀，食餐飯肚仔唔舒服又嘔，真慘情。
中高檔火鍋店牛肉豬肉傻傻分不清｜網民認為樓主有責任：咁你想點賠償你去洗胃？
當然，也有不少網民覺得樓主有責任，不要輸打贏要：「咁你想點？全單免費？賠償你去洗胃？ 同隻牛打齋？」
「其實生牛同豬，你唔食開既應該自己都分到，無理由人地講乜都信晒，自己都有少少責任。」
「你唔食得牛肉但係又叫牛肉。」、「你咁大個人你唔識分牛同豬？？？？個樣差別咁大，你都好有問題。」
最後，有網民站出來講公道話：「點解會有人鬧樓主唔識分豬定牛，重點係個職員講錯，問題喺個職員身上，係間公司嘅問題…」
為此，樓主更搞笑為當日的肉片食材照片上載，讓網民投票是牛是豬，結果呢？事主用這句話無奈作結：「你地自己都唔識分，仲要係度blame victim。」
圖片來源：jmjm__mi2@Threads