社交平台，有時的確是救命草！一位貪玩失魂的移民加國港女，在多倫多大雪日，因在雪堆中太忘我，意外將戴在手中的婚戒連雪一起抛掉飛走！港女情急之下在網上發文求救，此舉竟然被當地熱心人看到，二話不說帶同一樣秘密武器在雪地尋戒，居然成功找到鑽戒，失而復得，太感動。
移加港女kellyli0324心急在網上發帖文，並稱：「今日個個都分享多倫多咁大雪。無錯，偏偏咁大雪嘅今日，我！跌！咗！隻！結！婚！戒！指！因為我衰拎起啲雪玩，一拋就連埋隻戒指飛走，埋了在雪底，我地搵咗三個鐘都搵唔到，手指腳指凍到痹曬，我好對唔住我老公🥹🥹。」
港女內疚地說，因為這是老公辛苦儲錢買來的婚戒，故情急之下向脆友求救，「希望溶雪之後，可以有一絲希望搵得返，會有薄酬。」
眾志成城為婚戒 熱心人極速尋回感動萬民｜金屬探測器都有 成功尋婚戒大癲！
不久後，奇蹟的事發生了！當地一位熱心網民Sinnnnnntung忽然在帖文下留言：「我唔知點聯絡你呀？」附圖之中，竟然手執了失魂港女的婚戒，連帶熱心網民的外籍朋友片段，他們幫忙找到婚戒後，笑到見牙唔見眼，簡直感動萬民呀！
熱心網民更報了平安：「大家唔使推啦🤣 已經搵到樓主交收，同埋係用metal detector !我哋小小開心到失控 🤣🤣。」
謎底解開了，竟然出動到金屬探測器，大癲！
眾志成城為婚戒 熱心人極速尋回感動萬民｜網民嘖嘖稱奇：香港人世一 真係好有效率
一眾網民得知婚戒奇蹟出現，嘖嘖稱奇，高呼人間有愛呀！
「第一個癲：有喺附近嘅香港人睇到呢個po
第二個癲：佢帶埋metal detector去搵
第三個癲：又真係比佢搵到 」
（全對，全部加埋，機會率有幾高？）
「唔見咗戒指，癲；2個鐘真係有人搵得返，癲；4個鐘後交收埋，癲；今次真係threads 正確使用，香港人真係好有效率。」
「我覺得成件事最癲，係擁有一個金屬探測器。 」（係囉，金屬探測器都有，贏晒！）
「點解你會有metal detector😂😂🤣🤣🤣 」
「香港人世一。」、「祝你永遠廁所有廁紙，搭車唔會送車尾」。
「搵到戒指呢位人兄，個樣應該興奮過物主！有metal detector大癲🤣 」
至於樓主，不忘再三多謝一眾網民的熱心幫忙，字裡流露出失而復得的喜悅：「好多謝你哋🥹🥹🥹🥹🥹好感動 。」
圖片來源：kellyli0324@threads