港人日日趕着迫車上班下班，營營役役，忙起上來，大頭蝦遺失東西在車上，你說多可惜。不過，一位網民近日出Po，特別鳴謝另一位有緣人港鐵乘客，非親非故，竟然在一秒之間「神助力」，勇救樓主珍而重之的金御守，心頭好失而復得，好珍貴。
幸運兒ccmanlam近日發帖文，特別鳴謝勇救其珍貴金御守的一位有緣人港鐵乘客。「成件事係好L黐線，我當刻係眼泛淚光！」
樓主說，當然在港鐵上水站晚上，在車門即將關上之際跑入車廂，可能混亂之際，身上的Kurumi掛飾（金御守）跌了，就連樓主自己也不為意！
此時，樓主望到另一位有緣女生一樣沿着車廂跑來，然後對方竟然電光火石來一個「神助力」，「一手在門罅拋咗樣嘢入嚟，我第一吓嚇親！以為係恐怖襲擊💣 ，點知一望，原來是一樣熟悉的物件！」
樓主再稱：「我即刻執起，望向車窗個女仔，用手勢向佢示意，感謝🥹🥹🥹」。樓主還形容，那位神救勇士仍然「喘着氣」兼「臉都紅晒」，感覺就像是「拼了命都要將珍貴東西交還」一般。
整件事完全是有聲有畫面，除了大大力多謝港鐵乘客有勇、有謀、有愛以外，還要表揚樓主特地發帖文，希望那位有緣人可以看到。
樓主再三答謝：「好可惜唔能夠親口同你講多謝，真係真係萬分感激，希望呢個post你睇到🙏🏻。」
有緣人「天使神救」金御守｜失而復得網民激讚暖心舉動：唔係大事都感動到眼濕濕
一眾網民們看到帖文後，紛紛替樓主緊張之餘，更替樓主開心，真正是「福星高照🫰🏻」！
好人好事，真的又激動、又熱血！
「以為恐怖襲擊🤣🤣🤣🤣個女仔好好❤️ 。」、「掛件即刻好有價值，無價！好好收起佢啦🫶🏻」
不少網民也不忘叮囑樓主，要加倍力度守護失而復得的金御守！
「樓主不如唔好再掛喺袋🥹🥹，始終係金嚟，驚有人剪走偷咗去（如果咁啱有工具）🙂↕️🙂↕️ 。」
「窩心！好人又好彩🫶🏻。」、「我有啲好奇條罅得返幾闊😂。」
「我睇完你段字都戥你激動，喺你未嚟得切發現佢唔見咗，就已經昇華到失而復得嘅階段，個女仔又真係好勁，反應奇快！」
「完全想像到個女仔好強。」
「❤️❤️雖然唔係大事，但都感動到眼濕濕。」
「祝福那位善心小姐，去廁所一定有廁紙，要的士一定有的士。」（代有心人承你貴言！）
圖片來源：ccmanlam@threads