臨近歲晚，又有新型騙子出沒「搵食」？有網民近日發帖文，稱在港鐵天后站「偶遇」一位大叔，對方更毫無預警地向事主熱情打招呼！更爆破的事，事主聲稱不認識對方，大叔竟然一秒變臉，咩玩法？
脆友fongkw3在社交平台threads憶述數日前的事件：「剛才有一個完全陌生的60歲男子，在天后港鐵站隔離突然向我打招呼，像是熟朋友打招呼，我聽唔清楚佢叫我乜嘢 😆。」
事主續稱：「最初我以為佢叫第二個，我望吓我後面，佢的確係叫我，跟住我同佢講話，我唔識你喎唔好意思。跟住，佢個表情先係關鍵，佢望住我係有一些惱怒😠的樣子，有無人話俾我聽，呢個係咪詐騙？ 」
確實有夠騎呢，不過，大家紛紛質疑大叔的「關鍵變臉」，懷疑是其扮熟技倆，有企圖咁話。
大叔毫無預警熱情打招呼遭途人冷待一秒變臉｜網民質疑是騙子：問返佢爭我條數幾時還？
「九成係提子！」、「詐騙新手段、扮識。」
網民好心叮嚀事主萬事小心：「唔理咩人叫我都好，唔識嘅一律盡量零眼神接觸，直行直過，應佢機都多餘。」
「一係陌生，一係就唔陌生。點樣為之完全陌生、半陌生、少少陌生？ 」
「小心騙子，要找私家蒸探幫手嗎？」、「最近聽到幾單白撞，有捲土重來之勢 。」
「你問返佢，爭我條數幾時還呀？」
有網民分享差點中招的類似經歷：「我以前遇過婆婆級騙子，問我攞$20買粥食，我拒絕，佢即刻變臉，由可憐老婆婆樣，變到面目猙獰樣想嚇我！ 🥺➡️👺 」
「我試過，扮熟問你借錢（但我完全沒印象認識），又話火燭燒咗屋企，又話好耐無食飯，我話陪你去餐廳食，又話約咗人。當然我一蚊都冇借，後來總覺得是騙子。」
臨近農曆新年，大家出街都要小心為上。
圖片來源：fongkw3@threads