酒樓開開心心食餐飯，遇上要忽然無理加錢事件，確實會吃到一肚氣！有網民在社交平台怒斥一間街坊酒樓，斬乳鴿竟要加錢18元，究竟是酒樓收費苛刻，還是慣常的收費做法？
有網民早前於Facebook專頁「香港酒樓關注組」發帖文，嬲爆投訴天水圍一間街坊酒樓的不合理收費：「唔怪知得啲人上晒深圳飲飲食食， 2大1老。點了五個菜，最後點兩隻乳鴿，佢話乳鴿原隻上，我話一開四，佢話斬要加18蚊😱，一隻鴿48元，斬要加18元。
食咗幾十年飯，第一次遇到斬乳鴿要加錢。我真係嚇一跳，跟住我話唔怪之得咁多人上晒深圳飲食。咁咪唔斬囉！個侍應落完單，一轉頭就大聲講：咁你唔上大陸食！火都嚟！即刻起身X完佢走人。」
果然有聲有畫面，難怪樓主嬲嬲豬，一隻乳鴿48元，斬件要加18元，合共即要66元，再遇上侍應的惡劣態度，雙方發生口角，換來了不愉快的用餐經歷。
食客怒斥街坊酒樓斬乳鴿要加錢｜網民反應兩極：最憎啲酒樓呢樣那樣 不如唔好做特價
帖文一出，網民反應兩極，當然，跟樓主嬲爆酒樓做法的大有人在：
「真係第一次聽，乳鴿一開四要收$，咁叫隻雞斬咁多件收幾$？」(係囉，斬雞又點計？)
「我覺得香港的酒樓有時真係多X餘，你買得，都係希望多啲客人幫襯，點解唔斬件上枱？原隻上，你叫某啲客人點樣食呢？」
「48蚊一隻乳鴿都唔係平！所以個場咁吉，都唔係無緣無故的！」
「最憎啲酒樓呢樣那樣，不如唔好做特價！正常收費，正常出品唔得嘅！」
「寫48一隻，斬加18又真係貴嘅，好少會唔斬。」
「啲酒樓執咗，多謝呢啲阿姐！」
「開埋四連加一，咁咪七十幾蚊隻乳鴿？ 咁又離譜啲囉⋯⋯見過有啲酒樓連乳豬都唔切原隻上，呢啲仲癲。」
食客怒斥街坊酒樓斬乳鴿要加錢｜有網民撐酒樓正常做法：乳鴿特價嘢一般都免斬
「識得食乳鴿其實係要原隻食，一斬啲汁水就會流曬出嚟。」
「特價嘢一般都唔斬，有間酒樓做特價乳豬，都係成隻放上枱，然後俾把鉸剪你自己剪，剪到手抽筋！不過48蚊隻乳鴿，我又唔覺佢特價咗喎🤔。」(網民說出重點來！)
「人哋做一蚊燒雞，寫明免斬，要斬都係要加錢。」
「乳鴿特價免斬正常，可以用隻手當場手撕，無需得罪酒樓員工老闆。返大陸消費大勢所趨，你出到聲，點心姐姐當然會窒你呀。」
圖片來源：Facebook專頁「香港酒樓關注組」、網上圖片