香港日式美食大行其道，不過食安問題依然存在，屢次重複犯錯。有食客日前外賣一客日式吞拿魚蓉丼飯，竟然內有數條長長魚骨，望到都好牙煙！好易啃親。最嬲是餐廳最初企硬堅持不作退款，餐廳師傅更質疑樓主無中生有。今時今日，這樣的服務態度，麻麻地噃。
食客ihufovr898日前嬲爆在社交平台Threads發文，斥罵涉事日式餐廳：「希望貴公司俾到一個解釋我！」
「你XX分店嘅師傅，話我屈X佢，覺得我係為咗想攞個全單退款，而變三條魚骨出嚟呃退款！」
「叫咗個外賣壽司，食第一嚿已經有條好長嘅骨，到我食到第四嚿，又有一條骨！然後開吞拿魚蓉丼食，食第二啖居然再有條粗骨，上面係連住啲吞拿魚蓉，食到呢度，我已經唔想再食！」
吃了魚骨又一條，真的越吃越嬲，難怪樓主公審餐廳要求退款：「奈何貴公司嘅師傅表示絕無可能，不接受退款。我打過去同佢理論一番，佢表示我做咁多嘢，純粹都係想攞退款啫，佢話佢有檢查晒所有食材，無骨先出貨。」
真的慘情，吃了幾條魚骨，餐廳的師傅竟然無理不賣帳，還想砌詞質疑樓主的退款目的，好無奈。
再看看樓主上載的圖片，外賣平台的確寫明了商戶拒絕退款原因，理由是「師傅出餐有檢查，不可能會出現異物。」
外賣吞拿魚蓉丼飯藏魚骨一肚氣｜網民一面倒撐樓主派嬲：乜嘢叫正常唔會有骨 有語癌？
看到魚骨圖片巧驚驚，網民和樓主一樣，今時今日，這樣的服務態度，更為一肚氣！
「正常係有骨，但魚蓉就係要去骨，唔係我叫魚蓉既定義係乜？」
「佢都傻既，自己挑唔好比咗人仲要話人😂。唔通我為咗百幾蚊整舊魚骨屈佢咩！作為一個廚師，應有既態度佢都無。」
「真係唔好怪人北上（雖然我都係唔會北上😂）。」
「痴X線😂乜野叫正常唔會有骨？條友有語癌？即係魚本身係軟體生物？係海入邊無骨？而家擺明劏魚挑骨挑唔乾淨啦。」
「報東張再報食環，要佢哋道歉賠償認錯 ！」（幫緊你幫緊你。）
「吞拿魚蓉係來貨，佢都係客。」、「餐廳真係垃圾，罷食！」
外賣吞拿魚蓉丼飯藏魚骨一肚氣｜涉事餐廳後續有回應：已中止與該師傅的合約
其後，樓主在留言區繼續更新事件後續，並稱涉事餐廳終於有交代：「貴公司表明已中止與該師傅的合約，並承諾日後不會再錄用該位師傅於集團任何分店工作。」
樓主另指，餐廳亦承諾會作出退款。
圖片來源：ihufovr898@Threads