大環境市道低迷，餐飲業努力掙扎求存！西九龍中心的美食廣場，晚飯時間「一個客都無」，有小店告急出招，主動在網上熱血呼籲各位大神幫襯，救救本地小店！
本地小店在逆市之中各出奇謀，掙扎求存，連帶商場裡的小店，一樣如是。西九龍中心向來定位大眾化，是不少街坊尋寶地。其中，美食廣場主要集中在六樓和八樓，原來近期四樓的一角亦設有美食廣場，可惜懷疑商場缺乏宣傳，暫時淪為「半死場」狀態。
有小店oysterpower34近期在社交平台threads出招「求支援」，大力告急，兼宣傳新設的美食廣場：「西九龍中心四樓美食廣場，晚飯時間一個客都無！請求支援，唔買都嚟睇吓啦喂！」
西九龍中心美食廣場小店告急出招求幫襯｜網民搶先試食力讚：烤蠔真心抵食！
小店告急，引來大量網民熱議，不過普遍加埋無數黑人問號！
「原來咁多人唔知4樓有得食。。。」、「而家先知4樓開咗Food court！仲要係正常櫈！」
「我睇留言先知，原來咁多人唔知你哋呢個位有嘢食。。。你地呢個位幾間都好食！我都食過你啲蠔，真心抵同好食！」
「原來而家四樓都有，我以前去八樓先係Food court！」
「你都幾唔好彩，全楝最差既Food court層。」
「四樓呢度新裝修的，開咗唔係好耐，廁所都好新淨👍 ！」
「食過！！真心好食！隻隻都大隻肥美又鮮，價錢又抵，估唔到嘅係連杯檸茶都好好飲！但上次去食呢個位真係好靜🥹，希望多啲人試到店主嘅蠔 ！」
「支持支持！人生活着的意義，就是吃美食不是工作啊。」
「我係蠔精！唔睇你個post，都唔知道西九龍中心原來有一間係食烤蠔嘅！」
「生意難做，頂住呀！」
得到不少網民力撐，更有網民已經率先試試店主的烤蠔，賣相亦見精美！小店們，一起努力，頂住啊！
影片來源：oysterpower34@threads