奪命提示｜丁子朗生擒郭子豪大打出手 郭柏姸踢傷張振朗送小童護陰

喺TVB劇集《奪命提示》中飾演警察嘅丁子朗Karl 同郭柏妍Rosita，於劇中不時孖住出動查案以身犯險，而呢幕丁丁為咗奮力追捕疑犯大顯身手，同郭子豪 展開一場毆鬥追逐戰，喺後巷同村屋之間來回喪跑，丁丁同郭子豪仲打到鎖手鎖腳，搞到好似MMA一樣，事前丁丁為咗畫面更逼真，努力練習點樣生擒對手而多次碌地沙。

《奪命提示》呢度睇

郭子豪喺劇中飾演一位MMA拳手，所以喺追捕過程中佢就施展絕技甩身，丁丁笑言已經食咗兩個早餐嚟應付當日嘅體力消耗，又指反而辛苦子豪要做出大量咁用力嘅動作，對佢嚟講係一個好大動作挑戰戲，幸好二人默契十足。

Rosita同丁丁兵分兩路追截，見佢著住對有高踭嘅皮靴露長腿上陣，好彩劇組最後有啲鏡頭允許佢換上波鞋跑步，為咗拍攝呢套劇集，Rosita勤加操練運動，提升體能應付動作戲。

除咗打鬥戲緊張刺激之外，呢集嘅笑點位特別精彩，Rosita同張振朗會喺擂台上切磋時，振朗一邊昅女一邊上演男人最痛一幕，後續場面更加令人笑爆肚。