奪命提示｜劉穎鏇拍動作戲不慎受傷 張振朗首次開真槍表現好

 熱播劇《奪命提示》本周劇情刺激精彩，三對主角為查案而潛入直銷公司，追蹤神棍主腦，繼續喺荒山中展開「獵殺遊戲」。而精彩嘅動作場面背後，唔只喺體能上考盡演員，佢地仲要面對山野中嘅蚊叮蟲咬，陳山聰就話呢啲蚊就好似轟炸機一樣，非常恐怖。至於由廠景打到外景嘅劉佩玥更被山聰笑指已經一日冇沖涼，雖然阿Moon當然有為自己澄清，但亦可見佢哋真係拍得好辛苦。
撳入嚟《奪命提示》一齊追劇

振朗同劉穎鏇一場手持長槍嘅戲份亦拍得唔易，Tiffany要喺狹小空間做出打跟斗等連串高難度動作，雖然事前有跟武指學習，不過最後都係不慎整傷手指出血。至於振朗呢次就第一次開真槍拍戲，Tiffany讚振朗好叻可以做到唔眨眼。不過振朗就話多得Tiffany開第一槍先，令佢可以有心理準備。而Tiffany雖然喺《隱形戰隊》時就開過真槍，但話曬已經隔咗一段時間，所以佢都要慢慢熱下身先可以熟習返。
 
至於丁子朗同郭柏姸呢對就被扣上手扣以及綁上鐵鍊被吊上半空，好唔容易先成功脫身，呢場戲對丁丁嚟講真係好考體力，Rosita都話完全唔係睇落咁簡單。不過幾辛苦都好，最重要係拍出嚟好睇。