慧妍成員探訪老人之家 葉蒨文現身為老友記獻唱

港姐組織 慧妍雅集 今年成立40周年，多年嚟慧妍不時都舉辦唔同慈善活動，近日佢哋又再組織一班成員去老人院探訪，葉蒨文更加應邀現身一齊探訪一班老友記，仲開金口為大家獻唱呀。

莎莉亦因為老友記非常開心而即場決定Encore，仲同老友記齊齊合唱，之後佢仲話非常開心又感動，不過講到會唔會想開騷止歌癮，佢就話而家唱歌為咗大家開心多過自己開騷嘅滿足感多啲喇。

主辦活動嘅功臣 朱玲玲 同 王愛倫 仲有其他慧妍成員，好似 曹敏莉 劉倩婷 同埋 朱凱婷，就話終於可以再為老友記帶嚟歡迎非常開心，加上見到佢哋嘅笑容，就話咩辛苦都抵返晒喇。而有份現身嘅仲有 邵佩詩 同 黃嘉雯 ，佢哋仲話希望更多年青成員加入佢哋，同佢哋一齊為香港社會貢獻少少力量呀。

「慧妍雅集」成立踏入第40周年，特備節目12月10號喺翡翠台播出，由王賢誌、戚黛黛、朱凱婷擔主持，一眾慧妍雅集成員將傾巢而出，以唔同角度回顧「慧妍雅集」40年嚟大小事，當晚會以翻頁書形式訴說「慧妍雅集」成立故事揭開序幕，成員伴隨「慧妍雅集」會歌逐一出埸，展現各屆香港小姐不變嘅美態。

為答謝一直背後默默支持「慧妍雅集」嘅善長人翁，一眾慧妍會員仲會親自到農田等地搜羅食材，烹調6道美餚，務求為一眾善長準備新鮮又精美嘅「慧妍晚宴」。

三代慧妍會員透過三個不同層次表演，重新演繹經典歌曲《Que sera sera》，表現出歷代香港小姐嘅志向藉「慧妍雅集」得以承傳，為慧妍40周年慈善節目畫下完美句號，亦為「慧妍雅集」展開新嘅篇章。