炎明熹聽個案分享感鼻酸 擔心疼錫嘅人會忘記自己

Gigi炎明熹新歌《好想約你》MV點擊過二百萬，由於大家睇網上頻道官方MV嘅同時，贊助商 大家樂 會捐出款項協助香港認知障礙症協會，所以大家撐Gigi之外仲做埋善事一舉兩得。

呢日Gigi就去到 黃埔天地 出席慈善捐款活動嘅發佈會，仲即場同fans嚟個大合唱呀。Gigi話佢嘅Gi炎粉相當犀利，喺佢自己仲未記熟歌詞嘅時候，Gi炎粉就已經記晒成首歌點唱，佢又笑言因為之前同fans合唱過首歌嘅尾段，為咗好頭好尾，呢日佢就同大家合唱埋首歌嘅頭段呀。

講到首歌MV已經過咗二百萬，Gigi大讚呢個諗法好創新，因為可以邊睇MV邊做善事，佢又話以往個點擊數都冇升得咁快，應該係大家聽到可以做善事所以就更加積極，所以佢都好多謝大家嘅集氣令個MV有咁高嘅點擊。

為咗拍攝呢個MV，當日走訪咗香港多個富有情懷嘅地方取景，Gigi就分享返拍攝當日有唔少動物突入鏡頭，佢仲笑言要加返鳴謝畀佢哋呀。

活動上有認知障礙症嘅家屬上台分享經歷，Gigi話聽完之後鼻頭同心頭都一酸，因為佢好擔心疼錫自己嘅人會有一日唔認得自己，不話相信吸引力法則嘅佢，話好快就係心頭打消呢個念頭喇！