陳豪陳茵媺奉旨曬恩賜 自爆老婆中招後提心吊膽

由陳豪同袁偉豪主持嘅飲食節目《豪遊咖啡》嚟到最後一集嘅錄影，當然要搵啲重量級人馬啦！阿Mo呢次就奉旨晒恩愛，請嚟老婆Aimee陳茵媺做嘉賓，兩公婆嘆住咖啡嚟傾偈。

原來咖啡係佢哋兩公婆嘅共同嘗好，平日阿Mo都會擔任私人咖啡師沖杯靚啡畀太太歎嘅，Aimee就話其實未識阿Mo之前都仲會自己沖下咖啡研究下，但自從識咗對方之後，就覺得既然阿Mo咁專業，咁自己就可以放鬆啲咖使學，佢仲話而家每日都只係需要問：「老公你今日沖咩畀我呀？」就可以享受到專業咖啡師沖泡嘅咖啡，真係聽完令人好葡萄呀！

之前Aimee不幸中招，搞到要自己一個喺出面隔離，身為愛妻號嘅阿Mo就當然好擔心啦！佢就講返當時因為擔心老婆冇物資嗰啲，所以每日都會揸車過去望一望Aimee同遞啲物資畀對方，阿Mo仲話如果嗰日打畀Aimee而對方冇聽電話，就會好焦急驚對方係咪嗰舒服甚至暈咗，甚至會喺腦內有預劇場，思考係咪要撞門入去救老婆。而Aimee就解釋返阿Mo咁緊張，係因為自己體質易暈，加上當時只有自己一個喺單位內隔離，所以老公先會咁緊張啫。