Mayanne小喇叭丨袁偉豪自認唔襟撈 林盛斌獲邀演三級片 吳若希親揭「公審」老公真相

TVB清談節目《Mayanne小喇叭》由麥美恩（Mayanne）擔任主持，曾展望（GM）擔任助理主持，今晚（19日）10點半翡翠台播映最後一集。今晚一集，Mayanne邀來林盛斌（Bob）、朱咪咪、吳若希及袁偉豪（Ben）擔任嘉賓，大談「襟撈」定義兼八卦地狂數三名「襟撈」型男，分別係郭富城、碧咸及陳豪！
最後一集嘉賓有吳若希、袁偉豪 、朱咪咪同林盛斌。

事緣阿Bob談到「願意合照」係藝人襟撈其中一個準則時，Mayanne興奮地大談與碧咸嘅一次同台經歷：「當時我做MC，安排緊啲客同碧咸影相，佢就擰轉頭同我講『Would you like a photo as well？』」隨即引發全場尖叫，城城則獲阿Bob點名讚「合照來者不拒」。

阿Bob一講話曾經有人搵佢拍三級片，震撼到Mayanne即刻企起身。
對於網民嘅聲音，袁偉豪明顯睇淡咗好多。對於吳若希喺網絡「公審」老公，咪咪姐大表費解。

阿Bob又指「願意合照」其實是藝人絕佳公關：「嗰個人搵你影相，係因為佢鍾意你，佢咁同你影第一佢好開心，第二可能放社交平台讚吓你。」即場被票選為「襟撈」代表嘅阿Bob及咪咪姐更大方分享演藝界「襟撈」金科玉律。
Mayanne重演番吳若希當年喺頒獎禮失態一幕。

至於被即場票選為「唔襟撈」代表嘅吳若希，以及舉手自認唔襟撈嘅阿Ben，先後獲機會「自辯」。其中自與太太張寶兒結婚後飽受不少負評嘅阿Ben，直認當初確實介意：「我覺得你可以有自己睇法，最好唔好講嘢，唔好喺網上表達自己意見，就算好簡單講句『我唔鍾意』，每個人接收你嗰句唔鍾意都有唔同睇法。」阿Ben又指人生其實幾咁美好：「生咗小朋友又可以同小朋友玩，亦冇咁在乎得失同人哋評價，咁其實就冇嘢。」Mayanne及現場嘉賓即爭相指阿Ben放鬆咗不少，對此阿Ben笑指：「如果咁都唔鬆，真係唔使再撈喇！」

吳若希就解釋番當時嘅心情。

四位嘉賓仲大派花生，Mayanne重提吳若希當年喺《勁歌金曲》頒獎禮中，當宣布菊梓喬獲得女歌手獎時，如何overreact令全場爆尷嘅往事：「我喺個台度心諗『吳若希你收斂少少好冇呀？你興奮過得獎嗰個，唔該你坐番低啦」』吳若希即解畫：「因為我好緊張，當刻我心諗我未夠班，千祈唔好頒畀我呀，我攞咗又要畀人鬧喇。」Mayanne續指當時大會司儀喺台上盤數點樣為吳若希打圓場，咪咪姐聞言即搞笑講：「點兜啫，做到咁出面！」

阿Bob講番當年同細細粒嘅激烈親熱戲時，一度嚇親咪咪姐。

Mayanne繼續「針對」若希：「我成日懷疑點解佢仲喺呢行，佢成日辣著網民，我同佢影合照放社交平台，啲人會喺我度留言問我點解仲同呢個人做朋友。」並指若希出事原因係經常「公審」老公，咪咪姐聞言勁驚訝：「呢啲私隱做乜擺上網？」到底自封「小辣椒」吳若希會點樣回應？

對付負評，阿 Bob 有自己一套嘅應對方法。

當Mayanne問阿Bob接Job有冇底線，佢揞名爆曾推掉一部三級片隨即惹起哄動，阿Bob更會娓娓道來當時推卻邀約嘅真相！之後若希追問：「如果搵你好似黎諾懿要露半個pat pat呢？」阿Bob竟然爽快以五個字答案回應，到底又係咩？阿Bob親述曾親自回應網民負評往事，最終成功將嬲到爆粗留言嘅網民最後變成留言為阿Bob打氣，打底阿Bob點樣以奇招化解戾氣？

呢一集曾展望會為自己一件好唔識撈嘅往事公開道歉，到底咩事咁大件事？

《Mayanne小喇叭》今晚10點半翡翠台播最後一集