獎門人｜馮盈盈寸爆梁競徽帶貨冇生意朱咪咪與眾型男輪流啜享艷福

今個星期日（21日）播出嘅《獎門人Hug Hug媽咪感謝祭》，依舊有「獎門人」曾志偉、「獎老」錢嘉樂、阮兆祥、麥美恩、林秀怡及林正峰，仲有《逆天奇案2》演員陳展鵬(煎Pan)、林夏薇(薇薇)、方力申(Alex)、劉佩玥(Moon)、張頴康、馮盈盈、高鈞賢(Matthew)同梁小冰組隊，對戰「朱隊友」隊朱咪咪、陳煒、郭政鴻、袁偉豪、張振朗(Owen)、范振鋒同梁競徽。

今集嘉賓陣容有「逆天奇案2」隊對戰「朱隊友」！

咪咪姐每次上遊戲節目玩得好投入，喺「開心無敵啜乒乓」中，除咗獲優待慢慢啜，仲被煎Pan點名對決啜乒乓，咪咪姐輸人唔輸陣豪言：「你夠膽就啜走個波！」咪咪姐又命令煎Pan唔准擘大口，自己再慢慢啜走乒乓波，場面搞笑。

朱咪咪霸氣十足。

「開心無敵傳紫菜」時同樣笑爆肚，咪咪姐先被兩大小生袁偉豪同張振朗夾擊傳紫菜，咪咪姐變怕醜妹唔敢擘大眼，之後獎門人再安排咪咪姐一人VS「逆天2」男子組，《逆天2》總監製劉家豪落場玩埋一份，家豪哥一馬當先捉實咪咪姐傳紫菜，之後四大型男方力申、張頴康、高鈞賢同陳展鵬肉緊捉住咪咪姐輪住啜，引發全場觀眾笑爆。

咪咪姐被型男夾擊。

家豪哥啜埋一份。

咪咪姐被咁多位型男輪住啜。

煎Pan同薇薇玩起嚟默契十足，喺「開心無敵落大閘」顯得好合拍，薇薇又跪地又趴地，為取勝不顧儀態。而喺「開心無敵私人醒」就成為兩隊隔空罵戰嘅戰場，其中一條題目「講咗畀人掌嘴嘅說話」，煒哥先寸爆小冰「收檔啦」，小冰唔執輸反擊「做極都唔紅呀你」；之後盈盈寸爆近年喺內地帶貨嘅競徽：「你賣嘢全部畀人退貨，零營業額呀﹗」競徽不甘視弱「回敬」：「你套套劇擔正但全部仆直冇收視，除咗《逆天2》！」

首個遊戲「開心無敵啜乒乓」。陳煒亦瞓身玩遊戲。馮盈盈擘大口!久未亮相遊戲節目的咪咪姐獲優待可以慢慢啜。小方 vs 陳煒都好有睇頭。

此外，觀眾於收看節目期間只要嘟一嘟螢幕上嘅QR Code，就有機會搶到999.9足金玫瑰花同5.8萬封現金利是。此外，獎門人宣布下一集係本季《獎門人》最後一集，只要掃螢幕上QR Code並完成指定任務，便有機會贏取下集《獎門人》入場券，總數共200張。

小冰同陳煒好有火花。唯唯個樣好肉緊。盈盈玩到好激動。薇薇同展鵬神同步。