陳展鵬唱情歌為劇情留白 開腔澄清老婆單文柔有喜

劇集《逆天奇案2》播出以嚟大受歡迎，一班演員林夏薇、陳展鵬、方力申、馮盈盈，劉佩玥等呢日同埋劇集總監製劉家豪拉大隊到商場宣傳同觀眾近距離見面，為劇集獻唱主題曲嘅周吉佩同埋獻唱插曲嘅展鵬分別開腔獻唱，佢哋唔單止受到台下fans歡迎，台上全員都一齊舉牌化身粉絲，支持阿Wing同森Sir，兩人仲手拖手好sweet，薇薇就面都紅晒，而展鵬就話好冧，覺得拍檔間真係好有愛，所以佢已經同家豪講無論收視係點，都要開拍《逆天奇案3》呀。
  
展鵬早前同老婆單文柔慶祝生日時，喺社交平台po 相被眼利網民發現刻意遮肚，似係即將有喜訊帶畀大家喎，不過展鵬就否認，只係話佢要谷肥太太，等佢健康啲開心啲，因為佢話觀眾鐘意Phoebe圓潤啲喎，佢仲食咗豹子膽，話太太唔及佢咁上鏡，不過之後佢又即刻補鑊，大讚鏡頭後嘅Phoebe好正，有前有後，入得廚房出得廳堂呀。
 
劇集獲得連續兩星期七天跨平台平均收視，黃金時段冠軍，亦喺內地一個權威網站打入劇集收看平均數字第二位，成績捷捷上升。而出場無耐嘅阿Moon上輯飾演家姐柔麗，今輯以妹妹柔倩嘅全新角色出現，不過佢就話一定會令觀眾好驚喜呀
  
為劇集獻唱主題曲嘅吉吉，首次歸隊參與劇集宣傳，獲大批粉絲支持，吉吉都話好開心可以參與其中，佢仲話自己都好有興趣拍劇，尤其想挑戰一啲搞笑詼諧角色。