逆天奇案2丨馮盈盈失控爆喊演技獲讚進步 陳展鵬 高鈞賢NG引發連串笑料

陳展鵬、林夏薇、方力申、張頴康、劉佩玥、馮盈盈等主演嘅劇集《逆天奇案2》，喺5月1日播出嘅一集，Daniel（高鈞賢飾）喺工作時遇上火警陷入昏迷，未婚妻Ana（馮盈盈飾）得悉噩耗後大受打擊崩潰爆喊，場面心酸。盈盈喺呢場戲再晒喊功，將內心崩潰、無助感演繹到位，不少網友都讚佢喊功有進步。對於「絕世暖男」Daniel陷入昏迷，網友就大感肉緊，並希望佢盡快甦醒同Ana結婚，有個美滿收場。
高鈞賢喺工作時遇上火警陷入昏迷。
高鈞賢（Matthew）昏迷場口雖然令人痛心，但拍攝時卻笑料百出。無綫官方平台釋出《逆天2》NG花絮片段，內容係盈盈拍攝探望昏迷Matthew嘅場口，Matthew本來應該緊閉雙眼，但佢無啦啦睜開眼話：「I am so Sorry！」原來拍攝時有人打電話畀Matthew，盈盈都忍唔住爆笑話：「醒返呀佢！」另一場O記食飯場口，陳展鵬誤將「狗急跳牆」講成「狗跳佛牆」，令同場演員聽到成頭黑人問號。
馮盈盈得悉噩耗後大受打擊崩潰爆喊，場面心酸。馮盈盈崩潰喊戲被受讚賞。
另一笑位，係出名貪小便宜兼計到盡嘅莫Sir（李國麟飾）教一班下屬點樣可以買到性價比最高嘅三餸飯，仲話：「三餸飯同兩餸飯都係用同一種飯盒裝，你落單時先叫兩餸，等阿姐將啲餸裝滿晒喇，你先同佢講唔好意思，我想食三餸。因為餸菜分為可量化同不可量化，豬扒、雞翼呢啲屬於可量化，粟米肉粒、麻婆豆腐呢啲就屬於不可量化，所以揀餸時要先揀不可量化，呢啲冇得畀少你，之後再追加可量化。」

《逆天奇案2》逢星期一至五 20:30 翡翠台
高鈞賢場昏迷笑料百出。高鈞賢場昏迷笑料百出。陳展鵬誤將「狗急跳牆」講成「狗跳佛牆」。李國麟教下屬點樣可以買到性價比最高嘅三餸飯。