《逆天奇案2》結局篇丨方力申剎停恐襲張頴康逃獄爛賭劉佩玥分享爆樽初體驗

《逆天奇案2》噚晚（8號）劇情峰迴路轉， Big Boss之一嘅冠峰（方力申飾）被阿Wing（林夏薇飾）善良溶化，不惜為救流浪狗小白墮崖，違反咗自己一直推崇嘅「物競天擇」規條，冠峰仲對住小白剖白：「我輸咗畀基因，小白我想做個普通人，想去愛一個人，我可以點做呀？」之後冠峰被一名路過老村民所救，逃出生天後即急急借電話發訊息剎停恐襲，並以「Perses」身份發聲明指唔會再攻擊香港，似乎想改邪歸正！
小方改邪歸正，獲救後即刻剎停恐襲行動。

魏子樂（張頴康飾）喺精神病院被其他院友襲擊受傷，坐白車送院期間發生交通意外，瘋癲嘅子樂趁機逃走，前往尋找同太太尤麗撞樣嘅悠倩（劉佩玥飾），仲將悠倩帶到地下密室「禁錮」。劉佩玥噚晚劇情仲大晒逆天長腿，爛賭婆嘅悠倩輸清光，之後被疊碼仔 Jimmy（袁鎮業飾）催還債，眼見悠倩冇錢還，Jimmy打算「抽水」當收息，機智嘅悠倩見情況不妙，出動逆天長腿搭喺Jimmy身上，氹佢玩「剝衫大話骰」，當悠倩趁Jimmy去洗手間時企圖逃走，點知被Jimmy識破，悠倩危急下拎酒瓶扑暈Jimmy才成功甩身。

小方以 Perses 身份發聲明，宣布停止再襲擊香港。

TVB官方社交平台分享相關場口花絮片，原來今次係劉佩玥人生爆樽初體驗，佢同袁鎮業睇Playback時興奮得大嗌：「睇吓，爆得幾靚，都話咗一次搞掂啦！」同樣係首次畀人爆樽嘅袁鎮業話：「都幾爽嘅，感覺好似頂頭鎚咁！」劉佩玥搞笑分享爆樽心得：「打嘅時候唔好用個底打落去，同埋要有信心、唔好驚，最緊要被打嗰個唔係我！」
另邊廂，Big Boss 張頴康趁亂逃獄。張頴康將劉佩玥「禁錮」，二人全程互動相當搞笑。劉佩玥大晒 42 吋逆天長腿。劉佩玥仲玩埋剝衫大話骰同爆樽！劉佩玥同袁鎮業都係第一次爆樽同畀人爆樽。