逆天奇案2 丨方力申指薇薇婚事有阻力 馮盈盈期待有情人終成眷屬

《逆天奇案2》呢個星期五(10號)就會播出大結局，故事進入白熱化階段，劇中人物嘅命運最終會點，相信觀眾都好期待，一眾主演嘅演員 林夏薇 陳展鵬 黃智賢 蔣祖曼 張頴康 劉佩玥 同馮盈盈 等繼續為劇集造勢，記招上總監製劉家豪，再次公布劇集收視創佳績。

啱啱星期一(6號)播出一集，薇薇飾演嘅阿Wing出動紙戒指，主動向獄中嘅森Sir陳展鵬求婚，呢一幕感動咗唔少觀眾，兩位當事人喺宣傳活動上，亦喺台上重現呢幕催淚畫面。不過今次就輪到森Sir跪地向阿Wing求婚，而紙戒指就換成真戒指。

講到呢幕戲份，薇薇都話估唔到一向淚腺唔發達嘅老公，都感動到變咗喊包，仲話要放狗去咬方力申，薇薇仲笑老公「而家都喊到咁，大結局點算？」又話老公係阿Wing同森Sir嘅CP粉。另一邊，原來單文柔讚展鵬喺獄中造型好有型，展鵬拆解指太太除咗覺得佢留鬚造型有型，應該仲諗緊點解坐喺森Sir對面嘅人唔係佢，佢哋又暗示兩人嘅感情線，喺大結局前仍然會遇到挑戰。

森Sir同阿Wing呢邊有突破性發展，另一邊嘅Big Boss小方同張頴康嘅劇情都越嚟越緊湊，小方就話森Sir同阿Wing想結婚無咁容易，因為要問准佢同阿康先。之前被網民指佢哋呢對CP都好吸引，鬼馬嘅阿康話嚟緊佢嘅角色清醒番，所以就會搞番啱方向。

馮盈盈以劇中滑浪造型現身，佢都話有人問佢係咪暗示喺劇中昏迷嘅Daniel(高鈞賢 飾)會康復，盈盈話當然想有情人終成眷屬，但究竟係點就要睇大結局。