/public/article/images/202405/0f4b657a-fb3d-4093-ac10-932ee2cb29b0.jpeg)
《逆天奇案2》噚晚（6號）一集講到森Sir（陳展鵬飾）被陷害入獄後，阿Wing（林夏薇飾）前往探望，經歷過患難後，阿Wing終發現原來心底一直都放唔低森Sir，佢隔住玻璃向森Sir講：「你出返嚟之後，有件好重要嘅事要做，明明我成日叫你『同事』，原來有啲嘢係呃到人，但呃唔到自己，今次呢件事我發現我哋都唔可以冇咗對方，你心入面有我，我心入面都有你。我睇到你條路變得好難行，我好心痛，我想話畀你聽，我好想同你一齊行。」
薇薇同展鵬經歷咗咁多嘢後，終於發現自己其實放唔低展鵬。
薇薇喺展鵬最艱難時期都冇離棄佢不特止，仲調番轉頭向佢求婚，女友力 Max！
一輪表白後，阿Wing戴上當年森Sir向佢求婚嘅紙指戒話：「許浚森，你仲願唔願意娶我呀？我諗咗咁耐，鼓起咁大勇氣先敢向你求婚，你唔係諗住Say No呀嘛？」被嚇呆嘅森Sir話：「娶，我梗係娶你啦！」最後兩人隔住玻璃做出定情Finger Cross手勢。薇薇戴上紙戒指一幕，引爆上輯森sir摺紙戒指向阿Wing求婚嘅浪漫集體回憶！其實紙戒指求婚情節靈感嚟自展鵬親身經歷，佢曾經公開現實中亦係以紙戒指向太太單文柔求婚，相當浪漫。
引爆上輯森 sir 摺紙戒指向阿 Wing 求婚的浪漫集體回憶！
另一邊，Nic Sir（黃智賢飾）同Hazel（蔣祖曼飾）嘅關係亦有所進展！原本Hazel因為Nic Sir爸爸福伯（李龍基飾）要求簽婚前協議書煞停婚事，知衰嘅「麻煩老爺」福伯急急出招補鑊，約Nic Sir同Hazel食飯時，透露睇相時被批印堂發黑將面臨劫數，借意催兩人結婚沖喜，講明不使再簽婚前協議之餘，仲賣口乖話：「我搞個龍捲風出嚟你哋都頂得順，一段感情經得起波折，一定打風都打唔甩！」Hazel聽畢態度明顯軟化，由「以後唔好同我提結婚兩個字」演變成「唔好提結婚住」，睇嚟二人關係柳暗花明。
「麻煩老爺」李龍基出招補鑊，黃智賢蔣祖曼婚事有轉機。
蔣祖曼對婚姻態度明顯軟化！
蔣祖曼由「以後唔好同我提結婚兩個字」演變成「唔好提結婚住」，唔怪得黃智賢咁開心啦。
《逆天奇案2》周一至五晚8:30翡翠台播映
