逆天奇案2丨唐冠峰真實身份揭盅 「狂熱信徒」方力申青筋盡現「癲」味濃

TVB劇集《逆天奇案2》噚晚（19號）呢集劇情有重大推進，原來冠峰（方力申飾）係魏子樂（張頴康飾）幕後代理人兼狂熱粉絲，喺暗網以Perses身份幫助子樂執行復仇計劃！冠峰與子樂年輕時早已認識，透過Online Game結為好友，冠峰與爸爸（黃子雄飾）住喺荒島，感到生活既苦悶又壓抑，後來經思想極端嘅子樂洗腦、殺咗自己「痛苦根源」親生父親，重獲自由返回城市，自此冠峰將子樂奉若神明。

小方身份曝光，原來佢係 Big Boss 張頴康嘅幕後代理人！

受盡喪妻之痛嘅子樂，喺暗網聯絡冠峰，要求冠峰代為執行報仇計劃；惟子樂後來腦部缺氧導致失憶，冠峰借協助O記查案為名、近距離接觸子樂，另邊廂，電腦奇才天祖（高鈞賢飾）與女友Ana（馮盈盈飾）協助警方凍結Perses嘅資金鏈，成功阻止Perses執行恐襲。

張頴康「洗腦」搞到小方弒父，小方幫張頴康報仇係為咗報恩。

冠峰深感自責之際，發現外國研發咗一種新藥可以加速修補大腦受損部位，遂希望以此藥喚醒子樂記憶，形象正面嘅小方今次罕有飾演反派，演出令人眼前一亮；小方今次演出難在要喺「理性睿智」Mode及「狂熱信徒」Mode之間不停切換，一時表現冷靜沉實、一時理性盡失兼躁狂。噚晚呢場小方VS高鈞賢、馮盈盈嘅網絡大戰，雙拳不敵四手嘅小方節節敗退，期間激動得爆汗，更谷到額頭青筋盡現，「瘋癲」指數爆標！

小方借協助警方為名，接觸張頴康為實。

小方劇中真正身份終於揭盅，受訪時笑言子樂係冠峰唯一嘅朋友：「佢係幫我脫離爸爸魔掌嘅人，所以當正佢係恩人，我要報恩幫佢完成報仇大計。」講到與張頴康非常合拍， 被笑指係CP，小方覺得同張頴康合作好開心，有商有量去傾點樣做好啲，小方又讚張頴康係一個相當專業嘅演員，希望將來可以再合作多啲！

小方隔空 VS 高鈞賢馮盈盈展開電腦大戰！

小方爆晒汗兼爆晒青筋，「癲」味勁濃。小方發現咗新藥可以幫到張頴康。睇嚟二人之後同警方仲有一番龍爭虎鬥。

《逆天奇案2》逢周一至五晚八點半翡翠台播映