朱千雪預產期照開工幸獲老公體諒 陳凱琳笑指嘉穎入產房細膽唔敢望

朱千雪（Tracy）同陳凱琳（Grace）呢日現身一個品牌活動，朱千雪預產期5月，目前仍繼續工作，千雪透露工作排至4月尾，佢笑指幸好有老公體諒，女強人千雪亦好有責任心，認為接咗工作就一定要完成。

已為三子之母嘅Grace覺得育兒最重要夠耐性，亦有跟好姊妹千雪分享媽媽經，二人一見面就好多嘢講，佢哋喺湊小朋友嘅觀念都幾似，Grace都送咗好多有用嘅嘢畀千雪，Grace笑指二人主要傾育兒嘅趣事。

千雪又指唔介意老公冇入產房陪產，而Grace笑指老公鄭嘉穎有陪入產房，不過嘉穎細膽唔敢望，Grace自言天不怕地不怕咩都要望吓，仲叫醫生揭開畀佢睇吓，Grace產後有睇片見到下面發生緊咩事！