榮獲1987年《香港小姐競選》季軍嘅林穎嫺,自從90年代移居美國後,就淡出娛樂圈專心相夫教子,阿Wing近日難得返港出席自己嘅新書簽名會,唔少粉絲都專程到嚟支持,當中仲有專登喺馬來西亞飛嚟香港嘅粉絲,對方仲話等咗阿Wing 30幾年。
阿Wing話今次本書係集合咗自己30年嘅經歷,由參選港姐,到喺美國生活點滴,仲有點樣教育到小朋友讀到著名嘅大學,修讀會計嘅佢亦喺書中分享理財心得。
當年參選過後,阿Wing都參演過唔少劇集,被捧成當家花旦,其中接拍過劉家豪筆下嘅劇集《大都會》,問到有冇同同劇嘅星爺周星馳、家豪哥等人聯絡,佢就話知道家豪哥忙緊《逆天奇案2》宣傳,唯有等對方榮休後,佢下次返港再相約對方,阿Wing又指劇中有聯絡嘅就有邵仲衡,不過由於今次返港時間好急,加上忙於籌備本書,所以冇特別約朋友。
講到三年前推出自己嘅個人頻道,阿Wing話係要一腳踢,成個頻道都係自己一個人做,原因係佢好享受做唔同崗位,由構思到剪接都做晒,令佢好有滿足感。
出席完簽名會翌日,佢就飛返美國,不過佢預告幾個月之後,暑假期間可以舉家再嚟香港出席書展,支持佢嘅新書宣傳。
登入後即可查看我的收藏
登入後即可查看瀏覽記錄