玲玲友情報丨金牌媒人林盛斌列5大筍點 讚佘詩曼係超級筍盤

麥玲玲主持嘅節目《玲玲友情報》，3號晚播出嘅一集以「筍盤唔係人人啱」做主題，請嚟金牌媒人林盛斌（阿Bob）擔任嘉賓。節目一開始，各主持要選出公司心目中筍盤，向來豪邁嘅黃紫恩Jojo忽然變得怕醜：「要喺公司揀個男筍盤真係好難揀，夾硬揀我會諗起一個人喎。話說前一排我整親塊面，跟住佢用好低沉聲線關心我。」Jojo講嘅係同台藝人李爾晨Kyle，佢透露自己受傷後獲Kyle體貼慰問，又事事提點自己：「你記住喇，身體呢啲嘢最緊要，做嘢唔係最緊要，你一定要照顧好自己呀。」Jojo仲含羞答答借螢幕傳情：「真係好多謝你對我嘅關心呀，Kyle。」
 Jojo指李爾晨Kyle係公司筍盤。
阿Bob係圈中有金牌媒人之稱，佢自言搵佢做媒人有幾樣規則要遵守：「我做媒人無利益，只係想成人之美，每次都會做好雙方背景審查先介紹。同埋其中一樣，我會要求雙方提供無P圖嘅相。」阿Bob透露遇過男仕只想呃女仔，根本唔係搵對象，呢類人會被列入黑名單。講到相睇，玲玲師傅自爆當年同老公亦係因為咁而認識，佢笑說：「我老公係相睇達人，我係負責接待相睇團，點知畀佢睇中跟住追我。」玲玲師傅自言當年有價有市，有唔少追求者。
 呢集嘉賓係圈中月老林盛斌。
節目中各人作不記名投票，揀選公司入面嘅女筍盤，藝人馮盈盈、蔡思貝、陳欣茵Yan Yan、Jojo等都榜上有名。阿Bob就話心水之選，是近日憑劇集《新聞女王》演Man姐而人氣爆升嘅佘詩曼，佢以「超級筍盤」形容對方，仲列舉阿佘5大「筍點」︰「阿佘真係無得頂perfect，人又靚、做嘢又叻、為人夠義氣仲要心地善良；淨係唔使你養呢樣，已經加晒分，仲想點。」
 玲玲自爆同老公因為相睇而認識。
此外，臨近節目尾聲，阿Bob終於亮出兩個筍盤畀Jojo同Yan Yan欣賞，一位律師另一位靚仔有型打扮入時，Jojo睇完相之後猛話「呢個收工行得」，要阿Bob即時介紹。到底兩個筍盤到底有幾筍、幾吸引，記得留意節目喇！

《玲玲友情報》逢星期三 23:00 J2 82台
Bob指阿佘喺圈中超級筍盤。