朱千雪對BB性別保持神秘 期待好姊妹麥明詩舉辧婚禮

準媽媽 朱千雪 同兩孩之母 孫慧雪 分別現身BB展活動，話咁快已經懷孕7個月嘅朱千雪透露，5月就係預產期。Tracy個肚已經有啲份量，但佢依然著住高踭鞋仲健步如飛，Tracy就話BB好錫自己，懷孕過程都冇咩唔舒服，即使面對妊娠反應，佢都覺得係件好事，以正能量去轉化事情。

Tracy話：「我心態係就算個肚大咗、嘔吐、肚餓等都係BB話我聽佢存在嘅訊息，會好好去擁抱。」自從陀B後，Tracy密密研究營養食材，自認本身為食，又鍾意食零食嘅佢，為咗陀B健康啲，就戒晒咖啡、汽水、糖同即食麵等，希望從清淡食物中搵到既好食，又有營養嘅樂趣。

喺情人節當日，Tracy因為喺社交平台出Post指bb係小情人，即引來腹中bb係男仔嘅猜測，不過呢日Tracy就保持神秘：「因為當日係情人節，仔女都係情人，不過大家猜測太多，我會等埋爸爸媽媽喺加拿大返嚟時一次過公開消息。」

好事浪接浪，Tracy嘅好姊妹麥明詩早前公布喜訊，即將同機師男友盛勁為拉埋天窗，Tracy話早前有同Louisa食飯見面，知道對方非常興奮，自己都戥好友開心，加上兩位當事人Tracy都認識，所以就更期待佢哋嘅婚禮，而進一步消息就留待一對準新人親自公布喇。

至於雪雪嘅囝囝現時6個月大，佢身形都恢復到懷孕前，雪雪話陀第二胎高峰期有170幾磅，花咗6個月時間減40磅，經過艱辛嘅過程先有現時嘅效果，想知有咩修身秘訣就聽吓雪雪嘅分享啦。