許冠傑以新歌紀念已故好友黃霑 邀請兩大才女黃妍黃宇詩獻聲

將於本月底舉行舉行一連三場紅館演唱會嘅歌神許冠傑Sam，早前曾透露演唱會中將會有一個向黃霑致敬嘅環節，而為表對霑叔嘅懷念，Sam特別灌錄新歌《紫信箋》嚟紀念對方，佢話：「與霑叔相識多年，對我來說他絕對稱得上是亦師亦友，這首由我親自填詞，詞意受霑叔啟發的《紫信箋》終於面世！我更特別找來靚聲女歌手黃妍Cath朗讀了徐志摩的《再別康橋》和《偶然》裡的經典詩句，讓她的聲音穿插在這首歌中。這是一次很有趣的合作和嘗試，作品亦充滿了人和人之間無限的思念。我會在紅館個唱現場演繹這首《紫信箋》，希望大家也會喜歡！」

對於當初知道有機會同歌神合作，Cath笑言以為係同事嘅整蠱，直到之後了解完係真嘅後，Cath就覺得相當榮幸同開心：「因為整件事很神級！今次我要負責的獨白是一些很文學式的詩句，幸好小時候曾參與朗誦活動，我在錄音室時立刻回想當時那種感覺，再加上聽過Sam哥的demo後，我便知道我要如何去演譯。」

呢次演唱會Sam同時邀請咗黃妍同埋霑叔嘅愛女黃宇詩，喺唔同場次分別為呢首歌獻聲，黃宇詩笑說：「我完全和樂壇沒有關係，但今次可以掹車邊和Cath一起參與這一盛會，更可以和Sam哥這個legend合作，我覺得很開心。」

除咗黃妍同黃宇詩外，今次Sam嘅演唱會表演嘉賓，仲有3月30號嘅龍婷，3月31號嘅炎明熹同埋 4月1號嘅梁詠琪，以及3晚都會出場表演嘅香港兒童合唱團。