DaDa陳靜性感騷腰現身 被半裸猛男圍住緊張尷尬

韓國人氣猛男即將嚟港演出，3位男主角姜天一、李國榮和鄭漢三呢日喺香港出席發布會，仲邀請咗身材出名火辣嘅DaDa陳靜性感現身，騷胸露腰硬撼3位肌肉型男，當3位型男仲圍住DaDa一邊跳舞一邊除衫，雖然DaDa面露尷尬神色，但都讚嘆型男一身肌肉線條好勁，所以自己都要有番少少線條去襯託番型男。佢仲話要乘機請教3位喺運動同自律嘅心得。講到女仕見到高大型男係咪一定會心心眼？DaDa話講唔係就假，因為見到高大型男一定開心。但另一角度，DaDa覺得見到佢哋係對自己嘅自律、耐性同意志力嘅鍛鍊，佢都承認同呢類型嘅男仔係有好感。

DaDa近年忙於事業，感情一直交白卷，而家即使有追求者都冇時間約會，叫有意追佢嘅男仕等吓先。下個禮拜，DaDa就會踏入35歲生日，佢話好多朋友想幫佢大搞生日，但係佢月尾要開拍新戲，因為要準備新戲都唔可以亂食嘢同需要注意作息，所以佢都婉拒大家嘅好意，加上佢話自己過咗鍾意慶祝生日嘅年紀，只要簡簡單單一句「生日快樂」已經足夠。