福祿壽訓練學院｜節目月底登場片頭率先公開 祖藍再扮偉仔祥師兄化身Wyman

由 阮兆祥 李思捷 王祖藍 主持嘅《福祿壽訓練學院》，月底將接棒《中年好聲音2》強勢推出。採用淘汰賽制嘅係香港首個扮嘢真人Show，《福祿壽訓練學院》集齊緊張、殘酷、啜核於一身，為緩和氣氛，製作組仲特別安排兩名同為港姐出身嘅「傻大姐」 郭珮文 同 陳懿​​德 擔任「扮工室助理」 ！

經過超過半年招募，最終製作組喺幾百名海選參賽者中，精挑細選別具扮嘢潛能嘅最終極入圍者接受福祿壽三子悉心調較，爭奪成為扮嘢接班人。為增強刺激感，三子屆時將「內鬨」為爭潛力扮嘢王明爭明鬥，揀選心水隊員過程更歷盡考驗。

相隔六年先再合體亮相TVB綜藝節目嘅佢哋嚴陣以待，單係首集節目預告，三子已絞盡腦汁研究扮嘢對象，為令觀眾「易入口得嚟又有新鮮感」，佢哋將經典造型重新包裝升呢2.0版本，祥師兄會扮演黃偉文、肥姐；而祖藍就扮演《金手指》版梁朝偉、鍾景輝；思捷就扮演鄭少秋同特朗普。

福祿壽星前為月底播出嘅新節目拍攝片頭

節目公開嘅三人2.0造型宣傳照，可見「黃偉文」同「《金手指》版梁朝偉」造型相當突出，架上墨鏡、黐上羊咩鬚嘅祥師兄、配以Shocking Pink浮誇衣著同重型首飾依然甚有睇頭；至於祖藍嘅「《金手指》版梁朝偉」除咗髮型同造型抄到足，祖藍仲神還原偉仔片中其中一個經典表情。

祖藍復刻梁朝偉《金手指》嘅外形非常神似

祖藍早喺2014年就曾扮梁朝偉獻唱《你是如此難以忘記》，當時佢喺MV中嘅「電眼」令人一眼難忘，除咗扮相極似，更多出一份灰諧感，相當爆笑。製作組有見及此， 向祖藍提出相隔成十年後再扮偉仔嘅提議，祖藍仲反建議扮演電影《金手指》中嘅梁朝偉，仲笑言：「呢個有信心啲，希望大家唔好柴台啦。」

祥師兄則重現Wyman嘅得獎打扮

製作組亦公開佢哋變身期間嘅花絮照，三子中以思捷嘅特朗普造型最花功夫；為配合特朗普輪廓，思捷要黐完假鼻再黐假下巴。為求像真，製作組仲為思捷黐上白毛鷹眉，整個上妝過程據知長達約個半小時，相當花心機。

李思捷嘅特朗普造型化妝都已經花唔少時間

為保持神秘感，製作組只公開思捷特朗普造型嘅變身過程，最後成品要待節目出街先可以一窺全貌。至於祥師兄同祖藍嘅黃偉文與及鍾景輝造型一樣費時，為扮得為維肖維妙，佢哋淨係黐頭套已經要花超過半小時， 祖藍仲索性邊黐邊瞓爭取時間休息。

三子今次以6個唔同造型上陣拍攝節目片頭，內容主要圍繞「扮嘢歷史」同「扮嘢定義」，當中仲會出動古希臘學者、 哲學家亞里斯多德等，聽落認真又帶神秘感，到底今次佢哋出盡渾身解數係咩葫蘆賣咩藥，記得留意3月31號開學嘅《福祿壽訓練學院》喇。