福祿壽訓練學院丨扮嘢界始祖盧海鵬「出山」坐鎮 思捷被場面感動眼濕濕

TVB扮嘢真人Show《福祿壽訓練學院》於4月14號播出頒獎禮篇，3位導師聯同24名學員炮製一個頒獎禮，「扮嘢界始祖」盧海鵬獲頒「福祿壽訓練學院榮譽博士」，年屆82歲嘅鵬哥依然好幽默。

鵬哥笑指冇做好耐都拎到個獎，證明啲人仲記得佢，鵬哥稱扮過嘅角色大部分都好深刻，各有各不同，鵬哥亦唔排除「出山」；阮兆祥、李思捷及王祖藍亦重現鵬哥扮過嘅角色致敬，思捷被場面感動到眼濕濕。

呢日一班學員相當勤力，不停換唔同造型扮演影視紅星，祥師兄帶領學員化身男團LOONG 9，唱跳練到上台前一刻，佢哋傾力演出，祥師兄希望學員喺表演裡面得到開心，先可以將歡樂傳遞畀觀眾；呢次大型頒獎禮，雖然學員呢一輪唔需要面臨被淘汰，下一輪就正式要foul人，三位導師都提醒學員要打醒十二分精神，祖藍就以一見鍾情比喻海選揀學生，過程似足拍拖咁，相處後可以會「分手」。

「扮工室助理」陳懿德呢日回應與羅天宇緋聞，二人被指鍾意打籃球而結緣，疑似暗地拍拖1年，德德指二人只係朋友關係，更以「前輩」稱呼對方！