StarTalk一氣呵成版｜范冰冰對愛情寧缺勿濫 喜見胞弟范丞丞努力上進

近日來港出席第17屆亞洲電影大獎嘅 范冰冰 ，作客《StarTallk》接受主播 潘盈慧 專訪。2017年冰冰憑《我不是潘金蓮》奪得《亞洲電影大獎》「最佳女主角」，今次擔任頒獎嘉賓，佢都話好希望同自己欣賞嘅演員吳慷仁交流下演技心得，佢又大讚梁朝偉喺每個角色裡面都咁迷人，最近更有欣賞偉仔新作《金手指》，當中嘅表現非常好。

經已一段時間冇喺幕前演出，冰冰透露啱啱有部同Liam Neeson合作嘅荷李活電影拍攝完畢，佢話拍攝過程雖然都會遇到一啲困難，但亦獲益唔少，話對方教咗佢好多表演方式，令佢成長唔少。冰冰仲話拍攝時正值中國嘅農曆新年，Liam Neeson知道呢個節日通常會一家人過，但係見到佢仍然工作，所以就送咗盆花畀佢，仲話：「妳將這個花好好呵護起來。」令冰冰感覺好溫暖，而冰冰亦禮尚往來，送咗兩盒茶葉比佢，令佢感受中國茶文化。

講到做演員呢樣工作，已經有26、27年，喺長期工作下，都會出現鬆懈狀態，冰冰話宜架嘅佢，眼光同視覺上都放得更寬廣，將來可能會同更多不同國家嘅演員合作。

對於點樣保持住美貌，冰冰話首先要調整自己心情，不論發生任何事，尤其係女性，每當發生事就會收埋喺心底，獨自去承受，但係其實都要調整心情。第二就係到佢呢個年紀一定要保持不能夠肥，因為肥胖就會睇起嚟好臃腫，或者有種疲憊感覺。對於護膚養生，佢覺得都係要吃得好、睡得好，如果有時間就可以去鍛鍊身體健身同敷面膜，佢話自己每日至少敷兩張面膜，令皮膚有足夠水感。至於食方面，佢話只要唔餓就唔食。

談到感情方面，冰冰覺得粉絲同一路有睇佢作品嘅觀眾，甚至家人都一定會關心，但佢覺得感情事都係講緣分，因為要遇到完全合拍嘅人係一件非常難嘅事，佢話遇到的話當然開心，如果冇都可以一個人生活得好，所以時下嘅女生都唔會急，因為遇到錯嘅人，經歷一段錯誤嘅情感，不如一個人好好保護自己、好好去工作、好好去做好自己嘅事業。如果遇到一個疼錫自己，又會令自己繼續追尋夢想，咁一定會係好幸運嘅事，所以佢都希望呢個幸運可以降臨自己頭上，阿盈再追問到若果被家人再追問催拍拖時會點處理，冰冰就笑笑口話到呢個年絕，就唔好再理我啦!

而冰冰嘅胞弟范丞丞亦係圈內人，冰冰話覺得弟弟嘅表現已經超出佢想像，佢話佢同弟弟都好幸運，喺一個有愛嘅家庭裡成長，佢話本身對弟弟要求無咁高，但見到佢好上進，好有要求，所以冰冰覺得呢樣嘢已經係額外禮物。佢表示曾經教過弟弟，一個人無論幾風光，佢背後都有成百上千嘅人幫你，所以要識得感恩，估唔到弟弟一直銘記於心，作為姐姐嘅冰冰都好感動。冰冰話自己同弟弟年齡相差19年，所以喺弟弟心目中，佢有一定嘅威嚴，至於兩人有無機會合作，冰冰就話都有呢個可能，但現階段都係大家各自將工作做好。

講到香港呢個地方，冰冰話自己都好希望同埋弟弟一齊嚟玩，佢覺得香港好啱Shopping ，加上有好多美食，冰冰就話最鍾情牛腩啦。