香港婚後事丨曾比特罕有談及感情觀 自認未有資格成為爸爸

《香港婚後事》今晚（26號）播出嘅第二集，曾比特Mike將以神秘嘉賓身份彈住結他出場，陳自瑤聽到結他聲即刻估中Mike係嘉賓。甚少談及感情觀嘅Mike，隨後被黎諾懿、Yoyo等人追問對結婚生子憧憬同規劃等。
呢集有阿Mike做神秘嘉賓。
講到婚姻議題，Mike有感「結婚」喺現今社會變得形式化，佢覺得伴侶相處溝通先係最重要：「結完婚都可以離婚，只係一張紙。如果同佢好close、大家相處好有愛嘅話，結婚係令大家段關係更加昇華；相反，本身唔係相處得特別好，結婚只不過係將呢個形式轉去第二個形式，冇解決過問題。」Yoyo問到可會生兒育女時，佢話：「未有資格成為一個爸爸。」點解Mike會咁講？就要留意節目喇！
佢哋一齊傾婚姻問題。Mike罕有地講感情事。
諾懿同羅天宇呢集仲有額外任務，就係盤點網絡十大男生最討厭女生行為，佢哋揭曉答案前問咗Mike嘅睇法，Mike指最怕女生約會遲到，仲以「我個朋友」身份分享曾等足7個鐘嘅深刻經歷。另外問到接唔接受到監控狂女友？Mike直言唔介意遭另一半查看手機，大前提係頻率問題：「半個鐘睇一次就over得滯！點樣令佢有安全感，呢個可能係我嘅責任。」
點解Mike會話自己未有資格成為一個爸爸？宿醉嘅Winki拍拍下要去嘔。

作為主持嘅賴慰玲同天宇亦成為被爆料及「攻擊」對象！Winki被爆酒量淺，喺拍攝節目第一日就因為宿醉嘔吐，諾懿遂踢爆佢前一晚只係喝咗兩杯啤酒：「隔咗咁耐，以為講笑，點知真係嘔！我哋真係錫佢，冇拍到佢嘔，點解唔拍佢嘔呢？」至於天宇就躺著都中槍，瘋狂被眾人輪流「攻擊」玩暗寸：「咁你呢？鍾意咩類型？」、「你講就最有公信力」等，搞到天宇尷尬又無奈，不停傻笑；經過一輪猛烈夾攻，天宇大談對「公主病」同「拿前任來比較」等討厭行為嘅看法，內容豐富又爆笑。由第二集開始，每集會不定時放送「惡搞小劇場」同真人騷彩蛋，呢集天宇喺彩蛋中會繼續被「蝦」，最終仲要「露宿街頭」，萬勿錯過。

《香港婚後事》逢星期四及五 22:30 翡翠台播映
今集有「惡搞小劇場」。