再見‧枕邊人丨Mandy回憶閃現 真兇呼之欲出 Kelly演繹3種情緒 大展咆哮功

《再見‧枕邊人》故事邁向結局周，雖然推顧晴天（黃智雯飾）落懸崖真兇仍未水落石出，但幾位男女主角嘅感情線繼續成為焦點，因為Rachel（張曦雯飾）收到晴天同萬森（馬德鐘飾）嘅擁吻片，妒火中燒嘅佢決定終極擘面，相約晴天到中環碼頭講數玩互摑之後，21日播出嘅一集再大晒心機，竟扮食安眠藥兼喺沖涼期間扮瞓搏取萬森緊張及同情，不過由於萬森早對Rachel起疑心，當場踢爆Rachel做戲，怒羞成惱嘅Rachel再度爆seed反擊，信任早已崩毁嘅「森美戀」危在旦夕…另邊廂晴天因意外跣倒撞到頭，腦內突然湧現關鍵回憶，相關回憶再度指向萬森係Big Boss！另晴天之前腦海亦曾閃現一名滿頭鮮血嘅女子對佢講：「你老公唔畀我見你，啲嘢喺佢度呀！」到底楊萬森是否真有古怪？
 張曦雯出浴戲。
而焦點場口，絕對係Kelly長達兩分半鐘嘅超委屈淚崩戲，劇情講述萬森同Rachel婚禮再度因為教堂維修事宜延期，由於Rachel深信萬森提出延期只係藉口，因而感到非常不安。Rachel父親朱賢達（杜燕歌飾）不甘女兒受委屈，欲打電話責備萬森之際，Rachel即時情緒失控，怒掟手機落地並咆哮：「唔使呀！都話唔使你囉！」並壓力爆煲崩潰痛哭：「我係委屈，但可以點呀？為咗佢，我咩都可以做，我咩都可以包容，我咩都可以忍，我愛佢呀！我好想嫁畀佢！但我逼得太緊，佢會唔要我，佢會唔要我㗎……」
 Rachel父親朱賢達不甘女兒受委屈。
Kelly由眼泛淚光到淚崩再到嚎啕大哭，短短一場戲呈現出三種層次情緒，更一度喊至青筋現形，而網民亦睇得相當肉緊，直呼：「朱朱好可憐」、「我係Rachel一定同晴天攤牌：個仔歸你、個男人歸我！」另Kelly喺社交網亦分享咗拍攝浸浴戲花絮片，見佢著住肉色打底上衣、頭披浴巾浸喺泡泡浴中扁晒嘴狀甚可憐，一旁工作人員仲話：「好慘」、「十個鐘滾水」，證明Kelly為咗拍攝相關戲份，足足浸咗幾個鐘熱水，盡顯專業一面。
Kelly劇中有唔少嚎啕大哭戲。