逆天奇案2丨大奸角魏子樂神情太恐怖 嚇窒張頴康大女同學仔？9歲大女妙絕神回應勁讚

劇集《逆天奇案2》最近熱播，劇中飾演大奸角「魏子樂」的張頴康，今輯依然好搶戲！雖然暫時出場機會不多，但他早前與方力申在監獄一場戲碼，以凌厲奸險眼神令人心寒！就連張頴康大女兒的同學仔，都被其演繹嚇得怕怕？

張頴康與太太麥雅緻婚後育有三名子女，包括9歲大女張雅喬、6歲二仔張迅橋同2歲細仔Maka。麥雅緻日前（15日）在社交平台有趣分享其大女「小豆」的搞笑對話：「早兩晚食食吓飯，小豆突然同我講 ，佢有個同學問佢：『你爸爸咁恐怖，點解你仲可以同佢一齊住？』點知小豆若無其事秒回：『 我媽媽發惡嗰時我仲驚呀，我爸爸冇乜嘢吖！』」

媽媽麥雅緻即時明白，原來天下媽媽咆哮發惡時，比老公演繹魏子樂時的演技更恐怖！相當搞笑。